پیٹرول اور ڈیزل کی قیمت میں 26 روپے 77 پیسے فی لیٹر اضافہ

(اسلام آباد) حکومت نے پیٹرول اور ہائی اسپیڈ ڈیزل کی قیمت میں 26 روپے 77 پیسے فی لیٹر اضافہ کر دیا ہے، جس کے بعد نئی قیمتوں کا اطلاق فوری طور پر کر دیا گیا۔

جاری نوٹیفکیشن کے مطابق پیٹرول کی نئی فی لیٹر قیمت 393 روپے 35 پیسے مقرر کی گئی ہے، جبکہ ہائی اسپیڈ ڈیزل کی فی لیٹر قیمت بڑھا کر 380 روپے 19 پیسے کر دی گئی ہے۔

وفاقی وزیر پیٹرولیم علی پرویز ملک کا کہنا ہے کہ علاقائی کشیدگی کے باعث عالمی منڈی میں خام تیل کی قیمتوں میں ایک بار پھر اضافہ ہو رہا ہے، جس کے براہ راست اثرات پاکستان پر بھی پڑ رہے ہیں۔

انہوں نے کہا کہ تیل کی بڑھتی ہوئی قیمتوں کے دباؤ اور عالمی شراکت داروں کے ساتھ معاہدوں کے باعث حکومت کو پیٹرولیم مصنوعات کی قیمتوں میں اضافے کا بوجھ منتقل کرنے کیلئے اقدامات کرنا پڑے۔

علی پرویز ملک کے مطابق حکومت نے جہاں تک ممکن ہوا عالمی سطح پر قیمتوں میں اضافے کا بوجھ خود برداشت کیا، جبکہ وفاقی اور صوبائی حکومتوں نے عوام کو تاریخی ریلیف پیکیج بھی فراہم کیا۔

وزیر پیٹرولیم نے کہا کہ دعا ہے کہ جلد علاقائی امن قائم ہو تاکہ عالمی منڈی میں استحکام آئے اور عوام کو پیٹرولیم مصنوعات کی قیمتوں میں ریلیف دیا جا سکے۔