سونے کی قیمت میں مزید کمی، فی تولہ 4 لاکھ 90 ہزار 862 روپے ہوگیا

(کراچی) عالمی اور مقامی مارکیٹوں میں مسلسل پانچویں روز سونے کی قیمت میں کمی کا رجحان برقرار ہے، جس کے بعد پاکستان میں فی تولہ سونا مزید سستا ہو گیا۔

آل پاکستان صرافہ ایسوسی ایشن کے مطابق عالمی اور مقامی گولڈ مارکیٹس میں آج بھی سونے اور چاندی کی قیمتوں میں کمی ریکارڈ کی گئی، جس کے نتیجے میں پاکستان میں فی تولہ سونے کی قیمت 5 لاکھ روپے سے مزید نیچے آ گئی۔

مقامی مارکیٹ میں 24 قیراط فی تولہ سونا 2 ہزار 900 روپے سستا ہو کر 4 لاکھ 90 ہزار 862 روپے پر آ گیا، جبکہ 10 گرام سونے کی قیمت 2 ہزار 486 روپے کمی کے بعد 4 لاکھ 20 ہزار 835 روپے ہو گئی۔

بین الاقوامی مارکیٹ میں بھی سونے کی قیمت میں 29 ڈالر کی کمی دیکھی گئی، جس کے بعد فی اونس سونا 4 ہزار 685 ڈالر پر آ گیا۔

ماہرین کے مطابق عالمی سطح پر سرمایہ کاری کے رجحانات اور خطے کی صورتحال میں تبدیلی کے باعث سونے کی قیمتوں میں اتار چڑھاؤ جاری ہے۔