ایرانی وزیر خارجہ عباس عراقچی آج سے اسلام آباد، مسقط اور ماسکو کے دورے پر روانہ ہوں گے

(تہران/اسلام آباد) ایرانی وزیر خارجہ عباس عراقچی آج سے اسلام آباد، مسقط اور ماسکو کے اہم سفارتی دورے کا آغاز کریں گے۔

ایرانی میڈیا کے مطابق عباس عراقچی کے دورے کا مقصد خطے میں جاری پیشرفت، جنگ کی تازہ ترین صورتحال اور امریکا ایران کشیدگی کے تناظر میں سفارتی مشاورت کو آگے بڑھانا ہے۔

ایرانی خبر ایجنسی کے مطابق وزیر خارجہ عباس عراقچی اپنے دورہ اسلام آباد کے دوران وزیراعظم شہبازشریف سے ملاقات کریں گے، جہاں دوطرفہ تعلقات، علاقائی امن اور جاری مذاکراتی عمل پر تفصیلی تبادلہ خیال ہوگا۔

ذرائع کے مطابق عباس عراقچی اسلام آباد کے بعد عمان کے دارالحکومت مسقط اور پھر روس کے دارالحکومت ماسکو کا دورہ کریں گے، جہاں وہ سیاسی قیادت سے مشاورت کریں گے۔

رپورٹس کے مطابق ان ملاقاتوں میں ایران پر امریکا اور اسرائیل کی جانب سے مسلط کردہ جنگ کی تازہ صورتحال اور خطے میں کشیدگی کم کرنے کے امکانات پر بھی گفتگو ہوگی۔

اس سے قبل حکومتی ذرائع نے بتایا تھا کہ عباس عراقچی کی مختصر ٹیم کے ساتھ اسلام آباد آمد متوقع ہے جبکہ پاکستانی مصالحتی ٹیم کی کوششوں کے نتیجے میں امریکا اور ایران کے درمیان اسلام آباد امن مذاکرات کے دوسرے راؤنڈ کا امکان بھی بڑھ گیا ہے۔

ذرائع کا کہنا ہے کہ امریکا کی لاجسٹک اور سکیورٹی ٹیم پہلے ہی اسلام آباد میں موجود ہے اور مذاکراتی عمل کیلئے انتظامات مکمل کیے جا رہے ہیں۔