صومالیہ کے قریب بحری قزاقوں کا آئل ٹینکر پر قبضہ، 11 پاکستانی یرغمال

(اسلام آباد) صومالیہ کے قریب بحری قزاقوں نے حملہ کر کے ایک آئل ٹینکر پر قبضہ کر لیا، جس کے عملے میں شامل 11 پاکستانی بھی یرغمال بنائے گئے ہیں۔

شپنگ ذرائع کے مطابق "اونر 25" نامی جہاز کو 21 اپریل کو بحری قزاقوں نے اپنے قبضے میں لیا۔ جہاز پر مختلف ممالک کے عملے کے ارکان موجود تھے جن میں 11 پاکستانی بھی شامل ہیں۔

ذرائع کا کہنا ہے کہ وزارت بحری امور کے ڈائریکٹوریٹ آف پورٹ کی جانب سے پاکستانی عملے سے رابطہ کرنے کی کوشش کی گئی، تاہم اب تک کوئی رابطہ نہیں ہو سکا۔

اس کے علاوہ جہاز بھیجنے والی ایجنسی کی جانب سے بھی تاحال کوئی باضابطہ مؤقف سامنے نہیں آیا، جس کے باعث اہل خانہ میں شدید تشویش پائی جا رہی ہے۔

عملے کے خاندانوں کے مطابق جہاز کے انڈونیشین کپتان کی رہائی کیلئے انڈونیشیا کی حکومت قزاقوں سے رابطے میں ہے اور مذاکرات جاری ہیں۔

اہل خانہ نے پاکستانی حکومت سے فوری مداخلت اور یرغمال بنائے گئے پاکستانیوں کی محفوظ واپسی کیلئے اقدامات کا مطالبہ کیا ہے۔