وائٹ ہاؤس عشائیہ میں فائرنگ: صدر زرداری اور وزیراعظم شہباز شریف کا گہرے صدمے کا اظہار

صدر آصف علی زرداری اور وزیراعظم شہباز شریف نے واشنگٹن میں وائٹ ہاؤس عشائیہ کے دوران پیش آنے والے فائرنگ کے واقعے پر گہرے صدمے اور تشویش کا اظہار کیا ہے۔

صدر آصف علی زرداری نے اپنے بیان میں اس واقعے کی شدید مذمت کرتے ہوئے اسے ایک گھناؤنا دہشت گردانہ عمل قرار دیا۔ انہوں نے صدر ڈونلڈ ٹرمپ اور خاتون اول کے محفوظ رہنے پر اطمینان کا اظہار بھی کیا۔

دوسری جانب وزیراعظم شہباز شریف نے سوشل میڈیا پلیٹ فارم ایکس پر جاری اپنے بیان میں کہا کہ وہ اس افسوسناک واقعے پر گہرے صدمے میں ہیں۔ انہوں نے کہا کہ یہ جان کر خوشی ہوئی کہ امریکی صدر، خاتون اول اور دیگر تمام شرکاء محفوظ ہیں۔

وزیراعظم نے مزید کہا کہ ان کی دعائیں اور نیک تمنائیں متاثرہ افراد کے ساتھ ہیں اور وہ سب کی سلامتی کے لیے دعاگو ہیں۔

یاد رہے کہ اس اہم تقریب میں امریکی صدر، خاتون اول اور جےڈی وینس سمیت تقریباً 2,600 افراد موجود تھے۔ فائرنگ کے واقعے کے فوراً بعد قانون نافذ کرنے والے اداروں کی ہدایت پر تقریب کو برخاست کر دیا گیا جبکہ تمام مہمانوں کو بحفاظت نکال لیا گیا۔