صدر آصف علی زرداری25اپریل سے یکم مئی تک چین کے دورے پر روانہ ہوں گے

اسلام آباد: صدر مملکت آصف علی زرداری آج سے یکم مئی تک چین کے اہم سرکاری دورے پر روانہ ہوں گے۔ترجمان دفتر خارجہ کے مطابق صدر آصف علی زرداری یہ دورہ چینی حکومت کی دعوت پر کر رہے ہیں اور وہ آج بیجنگ روانہ ہوں گے۔

بیان کے مطابق صدر زرداری 25 سے 27 اپریل تک صوبہ ہنان کے شہر چانگ شا جبکہ 28 اپریل سے یکم مئی تک صوبہ ہینان کے شہرسانیا کا دورہ کریں گے۔

دورے کے دوران صدر مملکت چینی صوبائی قیادت سے ملاقاتیں کریں گے، جن میں پاکستان اور چین کے درمیان دو طرفہ تعلقات، اقتصادی و تجارتی تعاون، سرمایہ کاری اور سی پیک پر تفصیلی تبادلہ خیال کیا جائے گا۔

ترجمان دفتر خارجہ کے مطابق یہ دورہ پاکستان اور چین کے درمیان اعلیٰ سطح روابط کی دیرینہ روایت کا حصہ ہے، جبکہ رواں سال دونوں ممالک کے درمیان سفارتی تعلقات کی 75ویں سالگرہ بھی منائی جا رہی ہے۔

بیان میں کہا گیا ہے کہ یہ دورہ دونوں ممالک کے درمیان "آل ویدر اسٹریٹجک کوآپریٹو پارٹنرشپ" کو مزید مضبوط بنانے کے عزم کا مظہر ہے اور اس سے باہمی تعاون کے نئے مواقع پیدا ہوں گے۔