پاکستان کا مقامی الیکٹرو آپٹیکل سیٹلائٹ ای او تھری کامیابی سے لانچ

چین کے تائی یوان لانچ سینٹر سے خلا میں بھیجا گیا، شہری منصوبہ بندی اور ڈیزاسٹر مینجمنٹ میں مدد ملے گی
اسلام آباد: پاکستان کا مقامی الیکٹرو آپٹیکل سیٹلائٹ ای او تھری کامیابی سے خلا میں لانچ کر دیا گیا ہے، جسے ملکی خلائی پروگرام کیلئے ایک اہم سنگ میل قرار دیا جا رہا ہے۔
آئی ایس پی آر کے مطابق سیٹلائٹ کو چین کے تائی یوان لانچ سینٹر سے کامیابی کے ساتھ خلا میں بھیجا گیا۔
آئی ایس پی آر کا کہنا ہے کہ ای او تھری سیٹلائٹ کا کامیاب تجربہ پاکستان کیلئے نہایت اہم پیش رفت ہے، جو شہری منصوبہ بندی، ڈیزاسٹر مینجمنٹ، زرعی پیداوار اور خوراک کے شعبے میں بہتری لانے میں مدد فراہم کرے گا۔
بیان کے مطابق یہ سیٹلائٹ ماحولیاتی تحفظ، ترقیاتی منصوبہ بندی اور قدرتی وسائل کی نگرانی میں بھی اہم کردار ادا کرے گا، جبکہ یہ مربوط ارتھ آبزرویشن سسٹم کی بنیاد فراہم کرے گا۔
حکام کے مطابق ای او تھری سیٹلائٹ قومی ترجیحات کے مختلف شعبوں میں معاون ثابت ہوگا اور جدید ٹیکنالوجی کے ذریعے فیصلہ سازی کے عمل کو مزید مؤثر بنائے گا۔
وزیراعظم شہباز شریف نے اس کامیابی پر سپارکو کے سائنسدانوں اور انجینئرز کو خراج تحسین پیش کیا اور خلائی شعبے میں چین کے مسلسل تعاون کو بھی سراہا۔
Web Desk
Media Channel
شائع ہوا: 25 اپریل، 2026 کو 03:13 PM
آخری تدوین: 25 اپریل، 2026



