روس ایران اور خطے کے مفاد میں ہر ممکن اقدام کرے گا، ولادیمیر پیوٹن

(ماسکو)روسی صدر ولادیمیر پیوٹن نے کہا ہے کہ روس وہ سب کچھ کرے گا جو ایران اور خطے کے دیگر ممالک کے مفاد میں ہو۔

غیر ملکی خبر رساں ایجنسی کے مطابق روسی صدر ولادیمیر پیوٹن سے ایرانی وزیر خارجہ عباس عراقچی

نے ملاقات کی، جس میں دوطرفہ تعلقات، علاقائی صورتحال اور موجودہ کشیدگی پر تفصیلی تبادلہ خیال کیا گیا۔

ملاقات کے دوران ایرانی وزیر خارجہ عباس عراقچی نے روسی صدر کو ایرانی سپریم لیڈر کا خصوصی پیغام بھی پہنچایا۔

اس موقع پر ولادیمیر پیوٹن نے کہا کہ عباس عراقچی ایرانی سپریم لیڈر تک ان کی نیک خواہشات پہنچائیں۔ انہوں نے کہا کہ روس کو امید ہے کہ ایرانی عوام اس مشکل دور سے نکل آئیں گے اور خطے میں امن قائم ہوگا۔

روسی صدر نے مزید کہا کہ روس ایران اور خطے کے دیگر ممالک کے مفاد میں ہر ممکن اقدامات جاری رکھے گا اور خطے میں استحکام کیلئے سفارتی کوششوں کی حمایت کرتا رہے گا۔