کیئر اسٹارمر اور ڈونلڈ ٹرمپ کا رابطہ، آبنائے ہرمز میں بحری آمدورفت بحال کرنے پر اتفاق

برطانوی وزیراعظم کیئر اسٹارمر اور امریکی صدر ڈونلڈ ٹرمپ کے درمیان اہم ٹیلیفونک رابطہ ہوا، جس میں مشرق وسطیٰ کی صورتحال اور خصوصاً آبنائے ہرمز میں بحری جہازوں کی معمول کی آمدورفت بحال کرنے پر تفصیلی تبادلہ خیال کیا گیا۔

برطانوی وزیراعظم آفس کے ترجمان کے مطابق یہ گفتگو ایسے وقت میں ہوئی جب واشنگٹن میں ایک عشائیے کے دوران پیش آنے والے فائرنگ کے واقعے کے بعد کیئر اسٹارمر نے صدر ٹرمپ سے رابطہ کیا اور واقعے پر گہری تشویش کا اظہار کیا۔

کیئر اسٹارمر نے صدر ٹرمپ اور خاتونِ اول کے لیے نیک خواہشات کا اظہار کرتے ہوئے زخمی ہونے والے پولیس اہلکار کی جلد صحتیابی کے لیے دعا بھی کی۔

گفتگو کے دوران دونوں رہنماؤں نے مشرق وسطیٰ کی مجموعی صورتحال پر غور کیا اور اس بات پر اتفاق کیا کہ آبنائے ہرمز میں رکاوٹوں کے باعث عالمی تجارت متاثر ہو رہی ہے، جس کے نتیجے میں عالمی معیشت پر دباؤ اور مہنگائی میں اضافہ دیکھنے میں آ رہا ہے۔

ترجمان کے مطابق واشنگٹن میں پیش آنے والے فائرنگ کے واقعے پر بھی تفصیلی بات چیت کی گئی، جبکہ دونوں ممالک کے درمیان سکیورٹی تعاون اور خطے میں استحکام کے لیے مشترکہ اقدامات پر زور دیا گیا۔

یہ رابطہ ایک ایسے وقت میں ہوا ہے جب خطے میں کشیدگی کے باعث عالمی سطح پر توانائی کی ترسیل اور تجارتی سرگرمیاں متاثر ہونے کا خدشہ بڑھ رہا ہے۔