وائٹ ہاؤس فائرنگ واقعہ: کنگ چارلس کے دورۂ امریکا سے قبل سیکیورٹی مزید سخت کرنے کا فیصلہ

(واشنگٹن -محمد نعیم اختر) وائٹ ہاؤس پریس ڈنر میں فائرنگ کے واقعے کے بعد برطانیہ کے وزیرِ اعظم کے چیف سیکرٹری ڈیرن جونز نے کہا ہے کہ سیکیورٹی کے حوالے سے اہم مشاورت آج کی جائے گی، خاص طور پر آئندہ ہفتے کنگ چارلس اور ملکہ کمیلا کے امریکا کے چار روزہ سرکاری دورے سے قبل۔

ڈیرن جونز کے مطابق شاہ چارلس سوم اور ملکہ کمیلا کا دورہ پیر سے شروع ہوگا، جس کے دوران ان کی امریکی صدرڈونلڈ ٹرمپ سے وائٹ ہاؤس میں ملاقات بھی متوقع ہے۔

انہوں نے کہا کہ برطانوی حکومت اور شاہی محل پہلے ہی امریکی حکام کے ساتھ قریبی رابطے میں ہے، تاہم موجودہ صورتحال کے پیش نظر مزید مناسب سیکیورٹی انتظامات یقینی بنائے جائیں گے۔

دوسری جانب اپوزیشن کے شیڈو ہوم سیکرٹری کرس فیلپ نے بادشاہ کی مکمل حفاظت کو “انتہائی ضروری” قرار دیتے ہوئے فوری سیکیورٹی جائزے پر زور دیا۔

کرس فیلپ کا کہنا تھا کہ یہ دورہ ہر صورت جاری رہنا چاہیے کیونکہ تشدد کو سفارتی تعلقات میں رکاوٹ نہیں بننے دینا چاہیے۔

سیاسی مبصرین کے مطابق وائٹ ہاؤس میں حالیہ سیکیورٹی واقعے کے بعد اس اعلیٰ سطح کے شاہی دورے کی اہمیت مزید بڑھ گئی ہے، جبکہ امریکا اور برطانیہ دونوں اس دورے کو کامیاب اور محفوظ بنانے کیلئے متحرک ہیں۔