ایران کے جواب کا انتظار ہے، آج موصول ہونا چاہیے: مارکو روبیو

میڈیا سے گفتگو کرتے ہوئے مارکو روبیو نے کہا کہ امریکا کو امید ہے کہ ایران کے ساتھ جاری سفارتی رابطے مثبت سمت میں آگے بڑھیں گے۔ انہوں نے واضح کیا کہ حزب اللہ کے ساتھ مذاکرات نہیں کیے جائیں گے اور امریکا کی توجہ صرف لبنانی حکومت سے بات چیت پر مرکوز ہے۔

امریکی وزیر خارجہ نے دعویٰ کیا کہ امریکی نیوی نے ایران آنے اور جانے والے 70 ٹینکرز کا راستہ روکا ہوا ہے۔ انہوں نے کہا کہ اگر امریکا پر میزائل داغے گئے تو واشنگٹن بھرپور جواب دے گا۔

مارکو روبیو نے بتایا کہ پوپ لیو کے ساتھ ان کی ملاقات انتہائی مثبت رہی، جبکہ امریکا انسانی بنیادوں پر امداد میں اضافے کیلئے بھی تیار ہے۔ انہوں نے یہ بھی کہا کہ گزشتہ روز کی کارروائی کا "آپریشن ایپک فیوری" سے کوئی تعلق نہیں تھا۔

چین اور تائیوان کے حوالے سے امریکی پالیسی پر بات کرتے ہوئے انہوں نے کہا کہ چین اور تائیوان سے متعلق امریکی پالیسی میں کوئی تبدیلی نہیں آئی، جبکہ آبنائے تائیوان میں استحکام برقرار رکھنا انتہائی ضروری ہے۔

مارکو روبیو نے مزید کہا کہ امریکی صدر ڈونلڈ ٹرمپ کے ممکنہ دورہ چین کے دوران ان معاملات پر بھی بات ہوگی۔ انہوں نے یہ بھی کہا کہ امریکا روس اور یوکرین کے درمیان ثالثی کا کردار ادا کرنے کیلئے تیار ہے، تاہم اگر مذاکرات میں پیشرفت نہ ہوئی تو وقت ضائع نہیں کیا جائے گا۔