آبنائے ہرمز میں جھڑپوں کے باوجود جنگ بندی برقرار، ایران سے معاہدہ جلد ہو سکتا ہے: ٹرمپ

(واشنگٹن )امریکی صدر ڈونلڈ ٹرمپ نے کہا ہے کہ آبنائے ہرمز اور اس کے اطراف میں ایران کے ساتھ جھڑپوں کے باوجود جنگ بندی برقرار ہے اور ایران کے ساتھ مذاکرات مثبت انداز میں جاری ہیں۔

صحافیوں سے گفتگو کرتے ہوئے صدر ٹرمپ نے دعویٰ کیا کہ ایران نے امریکی بحری جہازوں پر میزائل اور ڈرون حملے کیے، تاہم امریکی افواج کو کوئی نقصان نہیں پہنچا۔

انہوں نے کہا کہ ایران کو آج امریکی بحری جہازوں پر حملہ نہیں کرنا چاہیے تھا، اس کے باوجود صورتحال قابو میں ہے اور دونوں ممالک کے درمیان ممکنہ معاہدے کی راہ ہموار ہو رہی ہے۔

ٹرمپ نے کہا کہ ایران جلد معاہدے پر دستخط کر سکتا ہے کیونکہ وہ کسی صورت ایٹمی ہتھیار حاصل نہیں کر سکتا۔

امریکی صدر نے مزید کہا کہ ایران کی پہلی رجیم ختم ہو چکی ہے جبکہ دوسری تقریباً ناکارہ ہو چکی ہے، اور اب امریکا “تیسری رجیم” کے ساتھ معاملات طے کر رہا ہے۔

اس سے قبل ٹرمپ نے اپنے سوشل میڈیا پلیٹ فارم “ٹروتھ سوشل” پر بیان جاری کرتے ہوئے کہا تھا کہ امریکا کے تین ڈسٹرائر بحری جہاز کامیابی سے آبنائے ہرمز عبور کر گئے، جن پر ایران کی جانب سے حملے کیے گئے مگر کسی قسم کا نقصان نہیں ہوا۔

دوسری جانب صدر ٹرمپ نے ایک بار پھر پاکستان کی تعریف کرتے ہوئے کہا کہ پاکستان ایک شاندار ملک ہے جبکہ پاکستان کے وزیراعظم اور فیلڈ مارشل بہترین شخصیات ہیں۔

امریکی صدر کے حالیہ بیانات ایسے وقت میں سامنے آئے ہیں جب خطے میں ایران اور امریکا کے درمیان کشیدگی برقرار ہے، تاہم سفارتی کوششوں اور ممکنہ معاہدے کی امید بھی ظاہر کی جا رہی ہے۔