آئی ایم ایف آج پاکستان کے لیے 1.2 ارب ڈالر قرض قسط کی منظوری دے گا

(واشنگٹن)آئی ایم ایف ایگزیکٹو بورڈ کا اہم اجلاس آج واشنگٹن میں ہوگا جس میں پاکستان کے لیے 1.2 ارب ڈالر قرض قسط کی منظوری متوقع ہے۔

وزارت خزانہ کے مطابق اجلاس میں پاکستان کے معاشی پروگرام اور اصلاحاتی اقدامات کا جائزہ لیا جائے گا جبکہ قرض کی یہ قسط ای ایف ایف اور آر ایس ایف پروگرامز کے تحت فراہم کی جائے گی۔

حکام کے مطابق اگر تیسرا جائزہ کامیاب رہا تو پاکستان کو ایک ارب ڈالر جاری کیے جائیں گے، جبکہ آر ایس ایف پروگرام کے دوسرے جائزے کے بعد مزید 210 ملین ڈالر ملنے کا امکان ہے۔

پاکستان اور آئی ایم ایف کے درمیان 27 مارچ کو اسٹاف لیول معاہدہ طے پایا تھا، جس کے بعد پاکستان نے ادارے کی بیشتر شرائط پر عملدرآمد مکمل کیا۔

وزارت خزانہ کا کہنا ہے کہ ایگزیکٹو بورڈ اسٹاف لیول معاہدے کی روشنی میں قرض پروگرام کی حتمی منظوری دے گا۔

وزیر خزانہ محمد اورنگزیب نے کہا ہے کہ پاکستان نے اسٹاف لیول معاہدہ کامیابی سے مکمل کیا ہے اور تمام پیشگی اقدامات بھی پورے کر لیے گئے ہیں، جس کے باعث قرض منظوری کی توقع مضبوط ہے۔

ماہرین کے مطابق آئی ایم ایف کی منظوری سے پاکستان کے زرمبادلہ ذخائر، معاشی استحکام اور بیرونی ادائیگیوں کی صورتحال بہتر بنانے میں مدد ملے گی۔