سی آئی اے رپورٹ: شدید بمباری کے باوجود ایران کا 70 فیصد میزائل ذخیرہ محفوظ

(واشنگٹن ) امریکی انٹیلیجنس ایجنسی سی آئی اے کی ایک خفیہ رپورٹ میں انکشاف کیا گیا ہے کہ مسلسل امریکی اور اسرائیلی حملوں کے باوجود ایران اب بھی اپنی بڑی میزائل صلاحیت برقرار رکھنے میں کامیاب ہے۔

امریکی اخبار کے مطابق رپورٹ میں کہا گیا ہے کہ ایران اپنے تقریباً 75 فیصد موبائل میزائل لانچرز اور 70 فیصد میزائل ذخیرے کو محفوظ رکھے ہوئے ہے، جس سے خطے میں جاری کشیدگی کے باوجود اس کی دفاعی صلاحیت کا اندازہ لگایا جا رہا ہے۔

رپورٹ نے امریکی صدر ڈونلڈ ٹرمپ کے ان بیانات پر بھی سوالات اٹھائے ہیں جن میں انہوں نے دعویٰ کیا تھا کہ ایران جنگی اور معاشی دباؤ کے باعث تیزی سے کمزور ہو رہا ہے۔

سی آئی اے کے جائزے کے مطابق ایران امریکی بحری ناکہ بندی کو کم از کم تین سے چار ماہ تک برداشت کرنے کی صلاحیت رکھتا ہے، جس کے بعد ہی اسے شدید معاشی بحران کا سامنا ہو سکتا ہے۔

رپورٹ میں بتایا گیا ہے کہ ایرانی حکومت نے اپنی زیرِ زمین میزائل تنصیبات کو دوبارہ فعال کر لیا ہے جبکہ تباہ شدہ میزائلوں کی مرمت کے ساتھ نئے میزائل بھی تیار کیے جا رہے ہیں۔

امریکی انٹیلیجنس حکام کا کہنا ہے کہ ایران کی میزائل اور ڈرون صلاحیتیں اب بھی خطے اور عالمی بحری تجارت کے لیے ایک بڑا خطرہ بنی ہوئی ہیں، خاص طور پر آبنائے ہرمز میں صورتحال انتہائی حساس ہے۔

تجزیہ کاروں کے مطابق یہ رپورٹ اس بات کی نشاندہی کرتی ہے کہ شدید فوجی کارروائیوں کے باوجود ایران کی دفاعی صلاحیت مکمل طور پر ختم نہیں کی جا سکی۔