آئی ایم ایف نے پاکستان کیلئے 1.2 ارب ڈالر قرض قسط کی منظوری دے دی

وزارت خزانہ کے مطابق یہ رقم توسیعی فنڈ سہولت اور ریزیلینس اینڈ سسٹین ایبلٹی فیسلٹی پروگرامز کے تحت فراہم کی جائے گی۔ منظوری کے بعد پاکستان کو ای ایف ایف پروگرام کے تحت ایک ارب ڈالر جبکہ آر ایس ایف کے تحت 210 ملین ڈالر اضافی موصول ہوں گے۔

حکام کے مطابق پاکستان اور آئی ایم ایف کے درمیان 27 مارچ کو اسٹاف لیول معاہدہ طے پایا تھا، جس کے تحت حکومت نے مالیاتی نظم و ضبط، ٹیکس اصلاحات اور دیگر معاشی شرائط پر عملدرآمد مکمل کیا۔

ایگزیکٹو بورڈ نے انہی اقدامات کی بنیاد پر قرض قسط کی حتمی منظوری دی، جس سے پاکستان کے زرمبادلہ ذخائر اور معاشی استحکام کو سہارا ملنے کی توقع ہے۔

وفاقی وزیر خزانہ محمد اورنگزیب پہلے ہی کہہ چکے تھے کہ پاکستان نے تمام پیشگی اقدامات مکمل کر لیے ہیں اور اسٹاف لیول معاہدہ کامیابی سے مکمل ہونے کے بعد قرض منظوری کی راہ ہموار ہو گئی تھی۔

معاشی ماہرین کے مطابق آئی ایم ایف کی منظوری سے عالمی مالیاتی اداروں اور سرمایہ کاروں کا اعتماد بھی بحال ہونے میں مدد مل سکتی ہے۔