ٹرمپ کا ایران پر دباؤ بڑھانے کا اعلان: بحری ناکہ بندی جوہری معاہدے تک جاری رہے گی

( واشنگٹن ڈی سی ) امریکی صدر ڈونلڈ ٹرمپ نے ایران کے خلاف سخت مؤقف اپناتے ہوئے اعلان کیا ہے کہ بحری ناکہ بندی اس وقت تک جاری رہے گی جب تک جوہری معاہدہ طے نہیں پا جاتا۔

میڈیا سے گفتگو کرتے ہوئے انہوں نے کہا کہ ناکہ بندی بمباری کے مقابلے میں زیادہ مؤثر ثابت ہو رہی ہے اور ایران اس وقت شدید دباؤ میں ہے، جبکہ آنے والے دنوں میں اسے مزید مشکلات کا سامنا کرنا پڑ سکتا ہے۔

صدر ٹرمپ نے آبنائے ہرمز کھولنے کی تجویز کو مسترد کرتے ہوئے واضح کیا کہ امریکہ ایران کو کسی صورت جوہری ہتھیار حاصل کرنے کی اجازت نہیں دے گا اور ناکہ بندی ختم کرنے کا کوئی ارادہ نہیں۔

دوسری جانب امریکی فوج آج صدر کو ایران کے خلاف ممکنہ نئے اقدامات پر بریفنگ دے گی، جس میں سینٹکام کے مختلف منصوبے پیش کیے جائیں گے۔

امریکی میڈیا رپورٹس کے مطابق حساس جوہری مواد کو محفوظ بنانے کے لیے اسپیشل فورسز کے ممکنہ آپریشن پر بھی غور جاری ہے، جبکہ ایران کی جانب سے ممکنہ جوابی کارروائیوں کا خدشہ بھی زیرِ بحث ہے۔