وزیراعظم کا اپنا گھر پروگرام: 1 کروڑ روپے تک ہاؤسنگ قرض، 20 سالہ آسان اقساط کا تاریخی پیکج

(اسلام آباد)تفصیلات کے مطابق گھر کی خریداری کے لیے زیادہ سے زیادہ 1 کروڑ روپے کا قرض 20 سال کی مدت کے لیے فراہم کیا جائے گا، جبکہ پہلے 10 برس کے لیے صرف 5 فیصد فکسڈ مارک اپ رکھا گیا ہے، اس کے بعد اگلے 10 برس میں نارمل مارک اپ لاگو ہوگا۔

حکومتی اعلامیے کے مطابق شہری 25 لاکھ، 50 لاکھ، 75 لاکھ یا پھر 1 کروڑ روپے تک اپنی ضرورت کے مطابق قرض حاصل کر سکیں گے۔ اس اسکیم کی خاص بات یہ ہے کہ قرض کے حصول کے لیے کسی قسم کی پیشگی فیس یا ابتدائی ادائیگی شرط نہیں ہوگی۔

وزیراعظم نے کہا کہ یہ منصوبہ متوسط اور کم آمدنی والے طبقے کو اپنا گھر فراہم کرنے کی جانب ایک اہم قدم ہے، جس سے ہزاروں خاندانوں کا گھر بنانے کا خواب پورا ہوگا۔

اسٹیٹ بینک آف پاکستان اور پاکستان ہاؤسنگ اتھارٹی فاؤنڈیشن مشترکہ طور پر اس منصوبے کی نگرانی کریں گے تاکہ شفافیت اور بروقت عملدرآمد یقینی بنایا جا سکے۔

قرض حاصل کرنے کے لیے درخواست دہندگان کو آن لائن اپلائی کرنا ہوگا، جبکہ درخواست جمع کروانے کے بعد حتمی منظوری تک تقریباً ایک ماہ کا وقت لگے گا۔

ماہرین کے مطابق یہ پیکج ہاؤسنگ سیکٹر میں نئی سرگرمی پیدا کرے گا، تعمیراتی صنعت کو فروغ دے گا اور روزگار کے نئے مواقع بھی پیدا کرے گا۔