محمد باقر قالیباف کا بیان: امریکی اقدامات سے عالمی تیل قیمتیں بڑھ گئیں

ایران کی پارلیمنٹ کے اسپیکرحمد باقر قالیباف نے کہا ہے کہ امریکہ کی جانب سے ایران کی تیل کی فروخت روکنے کے اقدامات کے نتیجے میں عالمی سطح پر تیل کی قیمتوں میں نمایاں اضافہ ہوا ہے، تاہم ایران کی پیداوار یا ذخائر کو کوئی بڑا نقصان نہیں پہنچا۔

سماجی رابطے کی ویب سائٹ ایکس پر جاری اپنے بیان میں انہوں نے کہا کہ تین دن گزرنے کے باوجود کوئی تیل کا کنواں تباہ نہیں ہوا اور صورتحال قابو میں ہے۔ انہوں نے دعویٰ کیا کہ ایران اس صورتحال کو مزید 30 دن تک برقرار رکھ سکتا ہے اور ضرورت پڑنے پر تیل کے کنوؤں کی براہ راست نشریات بھی دکھائی جا سکتی ہیں۔

حمد باقر قالیباف نے امریکی حکام، بالخصوص امریکی وزیر خزانہ سکاٹ بیسنٹ کو تنقید کا نشانہ بناتے ہوئے کہا کہ وہ ایران پر دباؤ ڈالنے کے لیے غلط اور بے بنیاد مشوروں پر عمل کر رہے ہیں۔

انہوں نے مزید کہا کہ ناکہ بندی کی پالیسی کو فروغ دینے والوں کے باعث تیل کی قیمتیں 120 ڈالر فی بیرل تک جا پہنچیں اور یہ بڑھ کر 140 ڈالر تک بھی جا سکتی ہیں۔ ان کے مطابق اصل مسئلہ کسی ایک حکمت عملی کا نہیں بلکہ پالیسی سازوں کی سوچ کا انداز ہے۔