ٹرمپ کے دعوے نے شاہ چارلس کو مشکل میں ڈال دیا، ایران کے جوہری معاملے پر مبینہ گفتگو منظر عام پر

( واشنگٹن ڈی سی ) امریکی صدرڈونلڈ ٹرمپ کے ایک بیان نے برطانیہ کےکنگ چارلس کو نازک اور پیچیدہ صورتحال سے دوچار کر دیا ہے۔ ٹرمپ نے دعویٰ کیا ہے کہ شاہ چارلس ایران کے جوہری ہتھیاروں کے خلاف امریکی مؤقف سے متفق ہیں، جس کے بعد یہ معاملہ سیاسی اور سفارتی حلقوں میں زیر بحث آ گیا ہے۔
رپورٹس کے مطابق یہ دعویٰ ایک نجی گفتگو کے حوالے سے سامنے آیا، جس کے منظر عام پر آنے سے برطانوی شاہی خاندان کے کردار پر سوالات اٹھنے لگے ہیں۔ مبصرین کا کہنا ہے کہ بطور آئینی بادشاہ، کنگ چارلس سوم سیاسی معاملات میں غیر جانبدار رہنے کے پابند ہیں اور ان کا کردار محض ریاست کی نمائندگی تک محدود ہوتا ہے۔
آئینی اصولوں کے تحت برطانوی بادشاہ حکومتی پالیسیوں، خصوصاً خارجہ پالیسی، پر کھل کر اظہارِ رائے نہیں دیتے۔ ایسے میں ایران کے جوہری پروگرام جیسے حساس معاملے پر کسی بھی قسم کا مبینہ مؤقف سامنے آنا شاہ چارلس کے لیے مشکلات پیدا کر سکتا ہے۔
سیاسی تجزیہ کاروں کے مطابق اگر اس دعوے کی وضاحت نہ کی گئی تو یہ برطانیہ کی سفارتی پوزیشن پر بھی اثر انداز ہو سکتا ہے، کیونکہ بادشاہ کا غیر جانبدار رہنا آئینی تقاضا ہے۔ اس پیش رفت نے نہ صرف شاہی خاندان بلکہ برطانوی حکومت کو بھی ایک پیچیدہ صورتحال میں ڈال دیا ہے، جہاں وضاحت اور احتیاط دونوں کی ضرورت ہے۔