پشاور میں سینٹر آف ایکسی لینس فار ڈیجیٹل و ہائی ٹیک اسکلز کا افتتاح، سہیل آفریدی کے اہم اعلانات

(پشاور) وزیر اعلیٰ سہیل آفریدی نے خطاب کرتے ہوئے کہا کہ جدید دور کے تقاضوں کو پورا کرنے کے لیے نوجوانوں کو ٹیکنالوجی کے شعبے میں مہارت دینا ناگزیر ہے۔

انہوں نے طلبہ کی صلاحیتوں کو بڑھانے پر زور دیتے ہوئے کہا کہ اسٹوڈنٹ ایکسچینج پروگرامز متعارف کروائے جانے چاہئیں تاکہ طلبہ کو بین الاقوامی تجربات سے فائدہ حاصل ہو سکے۔ وزیر اعلیٰ سہیل آفریدی کا کہنا تھا کہ دہشتگردی کے باعث خیبر پختونخوا تعلیمی میدان میں پیچھے رہ گیا، تاہم موجودہ حکومت اس خلا کو پر کرنے کے لیے عملی اقدامات کر رہی ہے۔

انہوں نے بتایا کہ صوبے میں 16 ہزار اساتذہ کی میرٹ پر بھرتی کا عمل جاری ہے اور اس میں کسی قسم کی سفارش کو برداشت نہیں کیا گیا۔ ان کا کہنا تھا کہ اگر کسی کو کرپشن کا شبہ ہو تو وہ بلا جھجھک شکایت کرے کیونکہ حکومت احتساب کے لیے مکمل طور پر تیار ہے۔

وزیر اعلیٰ سہیل آفریدی نے دعویٰ کیا کہ حکومت نے نااہل افراد کو عہدوں سے ہٹا دیا ہے اور بڑے و چھوٹے پیمانے پر کرپشن کا خاتمہ کیا گیا ہے۔ انہوں نے اس عزم کا اظہار کیا کہ تعلیم اور شعور کے ذریعے فرسودہ نظام کو تبدیل کیا جائے گا۔

انہوں نے مزید کہا کہ عمران خان اور بشری بی بی سے جیل میں ملاقات کی اجازت نہیں دی جا رہی، تاہم خیبر پختونخوا حکومت ان کے وژن کے مطابق کام جاری رکھے ہوئے ہے۔

تقریب کے اختتام پر انہوں نے اس عزم کا اعادہ کیا کہ صوبے میں تعلیمی اصلاحات اور ڈیجیٹل ترقی کے لیے ہر ممکن اقدامات کیے جائیں گے تاکہ نوجوانوں کو بہتر مستقبل فراہم کیا جا سکے۔