پاک افواج کی ہم آہنگی معرکۂ حق میں فتح کی وجہ بنی: ریئر ایڈمرل شفاعت علی

ریئر ایڈمرل شفاعت علی نے کہا کہ معرکۂ حق کے دوران پاکستان کی ساحلی تنصیبات مکمل طور پر محفوظ رہیں اور تمام بندرگاہیں معمول کے مطابق فعال رہیں۔ انہوں نے کہا کہ بھارت کو پاکستانی سمندری حدود کا رخ کرنے کی ہمت نہیں ہوئی۔

انہوں نے واضح کیا کہ پاکستان امن کا خواہاں ہے، تاہم اس خواہش کو کمزوری نہ سمجھا جائے۔ ان کے مطابق پاک بحریہ ملک کی سمندری سرحدوں کے دفاع کیلئے مکمل طور پر تیار اور چوکس ہے۔

ریئر ایڈمرل شفاعت علی نے مزید کہا کہ بھارت نے معرکۂ حق کے دوران متعدد بار بحری بیڑا تعینات کرنے کی کوشش کی، لیکن پاک بحریہ نے ہر صورتحال پر گہری نظر رکھی اور مؤثر حکمت عملی کے ذریعے سمندری دفاع کو یقینی بنایا۔

انہوں نے اس عزم کا اظہار کیا کہ پاکستان اپنی بحری حدود، بندرگاہوں اور ساحلی تنصیبات کے تحفظ کیلئے ہر ممکن اقدام جاری رکھے گا۔