لوگ میرے لنگر کی وجہ سے مجھ سے حسد کرتے ہیں: اداکارہ ریشم کا دیدار کو جواب

(لاہور) تفصیلات کے مطابق حال ہی میں پنجابی فلم اور تھیٹر انڈسٹری کی اداکارہ دیدار نے اداکارہ ریشم پر دوسروں کی زندگیاں خراب کرنے کا الزام عائد کیا تھا، جس کے بعد دونوں اداکاراؤں کے درمیان تنازع خبروں کی زینت بن گیا۔

اداکارہ ریشم نے ایک نجی پروگرام میں شرکت کے دوران بغیر کسی کا نام لیے تنقید کا جواب دیتے ہوئے کہا کہ ان کا وقت ابھی ختم نہیں ہوا اور لوگ ان کے لنگر سے حسد کرتے ہیں کیونکہ وہ اس کا خرچ برداشت نہیں کر سکتے۔

ریشم نے مزید کہا کہ ان پر تنقید کرنے والوں کی اپنی کوئی پہچان نہیں، بلکہ ان کی شہرت دوسروں کے سہارے قائم ہے۔ انہوں نے کہا کہ ایک اچھا انسان ہمیشہ مثبت بات کرتا ہے جبکہ منفی سوچ رکھنے والے صرف تنقید کرتے ہیں۔

اداکارہ نے کہا کہ لوگوں کو ان افراد کا ذکر کرنا چاہیے جنہوں نے اپنی زندگی میں کچھ حاصل کیا ہو، جبکہ بے بنیاد الزامات لگانے والوں کو نظر انداز کرنا چاہیے۔

اداکارہ ریشم اور دیدار کے درمیان جاری تنازع نے شوبز انڈسٹری میں نئی بحث چھیڑ دی ہے، جبکہ دونوں فنکاراؤں کے مداح بھی سوشل میڈیا پر اپنے پسندیدہ فنکاروں کے حق میں اظہار خیال کر رہے ہیں۔