ایران کے خلاف اسرائیل کی مہم ختم نہیں ہوئی، مزید کارروائی کا عندیہ: نیتن یاہو

(تل ابیب) غیر ملکی میڈیا کے مطابق اسرائیلی وزیراعظم نے لبنان کے ساتھ امن مذاکرات کی منظوری دیتے ہوئے ایک بیان میں کہا کہ اگرچہ خطے میں سفارتی پیش رفت ہو رہی ہے، تاہم ایران کے خلاف اسرائیل کی مہم بدستور جاری ہے اور "ہم اب بھی ان سے لڑ رہے ہیں"۔

بنیامین نیتن یاہو نے مزید کہا کہ اسرائیل نے ایران کے خلاف اپنی کارروائیوں میں متعدد کامیابیاں حاصل کی ہیں، تاہم ابھی بہت کچھ کرنا باقی ہے۔ انہوں نے دعویٰ کیا کہ اسرائیلی اقدامات کے نتیجے میں ایران کے جوہری پروگرام کو نقصان پہنچایا گیا ہے۔

اسرائیلی وزیراعظم کا کہنا تھا کہ ایران کے پاس اب بھی جوہری پروگرام کے لیے افزودہ مواد موجود ہے، جسے ہٹانا ضروری ہے۔ انہوں نے کہا کہ "جیسا کہ صدر ٹرمپ نے کہا، یہ مسئلہ یا تو معاہدے کے ذریعے حل ہوگا یا کسی اور طریقے سے۔"

نیتن یاہو کا یہ بیان ایسے وقت میں سامنے آیا ہے جب امریکہ اور ایران پاکستان کی ثالثی میں امن مذاکرات میں مصروف ہیں اور خطے میں کشیدگی کم کرنے کی کوششیں جاری ہیں۔

تجزیہ کاروں کے مطابق اسرائیلی وزیراعظم کا یہ سخت مؤقف خطے میں جاری سفارتی کوششوں کو متاثر کر سکتا ہے اور مشرق وسطیٰ میں کشیدگی برقرار رہنے کا امکان ظاہر کرتا ہے۔