ایران کے ساتھ کئی نکات پر اتفاق ہوچکا تھا، یورینیم معاملہ رکاوٹ بنا ٹرمپ کا دعویٰ

(واشنگٹن)وائٹ ہاؤس میں صحافیوں سے گفتگو کرتے ہوئے صدر ڈونلڈ ٹرمپ نے کہا کہ امریکی وفد نے ایران کے ساتھ اچھے مذاکرات کیے اور کئی معاملات پر سمجھوتا بھی ہو گیا تھا لیکن ایران یورینیم سے متعلق شرائط پر آمادہ نہیں ہوا۔

صدر ٹرمپ نے کہا کہ ایران معاہدے کے لیے بے تاب ہے اور آج ہی انہیں اس حوالے سے متعلقہ افراد کی کال موصول ہوئی ہے۔ انہوں نے دعویٰ کیا کہ ایران نے خود معاہدے کے لیے رابطہ کیا اور ڈیل کرنے میں دلچسپی ظاہر کی۔

امریکی صدر کا کہنا تھا کہ ایران کے پاس جوہری ہتھیار نہیں ہو سکتے اور اگر ایران اس شرط کو قبول نہیں کرتا تو کوئی معاہدہ نہیں ہوگا۔ تاہم انہوں نے امید ظاہر کی کہ ایران بالآخر اس شرط پر راضی ہو جائے گا۔

ایران کی جانب سے بحری ناکہ بندی کے سوال پر صدر ٹرمپ نے الزام عائد کیا کہ ایران دنیا کو بلیک میل کرنے کی کوشش کر رہا ہے اور امریکا ایسا ہونے نہیں دے گا۔ انہوں نے کہا کہ امریکا آبنائے ہرمز پر انحصار نہیں کرتا کیونکہ اس کے پاس اپنے تیل اور گیس کے وافر ذخائر موجود ہیں۔

صدر ٹرمپ نے مزید دعویٰ کیا کہ حالیہ دنوں میں بڑی تعداد میں بحری جہاز آبنائے ہرمز سے گزرے، اور ایک روز میں 34 جہازوں کی آمدورفت ہوئی جو حالیہ کشیدگی کے بعد سب سے زیادہ تعداد ہے۔

تجزیہ کاروں کے مطابق امریکی اور ایرانی قیادت کے متضاد بیانات سے ظاہر ہوتا ہے کہ مذاکرات میں پیش رفت کے باوجود اہم اختلافات بدستور برقرار ہیں۔