مذاکرات کا اگلا دور بھی آئندہ 2 روز میں پاکستان میں ہوسکتا ہے:

(واشنگٹن)ڈونلڈ ٹرمپ نے کہا ہے کہ ایران کے ساتھ مذاکرات کا اگلا دور آئندہ دو روز میں پاکستان میں ہونے کا امکان ہے۔

واشنگٹن میں امریکی اخبار سے گفتگو کرتے ہوئے امریکی صدر نے کہا کہ امریکا ایران مذاکرات کے لیے پاکستان جانے کے لیے زیادہ مائل ہے اور اگلے دو روز میں اس حوالے سے اہم پیش رفت ہو سکتی ہے۔

فیلڈ مارشل عاصم منیر کی تعریف

ٹرمپ نے کہا کہ پاکستان جانے کا زیادہ امکان اس لیے ہے کیونکہ پاکستان کے فیلڈ مارشل عاصم منیر کی کارکردگی شاندار رہی ہے۔ انہوں نے فیلڈ مارشل عاصم منیر کی تعریف کرتے ہوئے کہا کہ انہی کی مؤثر حکمت عملی کے باعث امریکا دوبارہ پاکستان میں مذاکرات کے لیے جانے پر غور کر رہا ہے۔

پاک بھارت کشیدگی کا حوالہ

امریکی صدر نے کہا کہ گزشتہ سال پاکستان اور بھارت کے درمیان کشیدگی کے دوران فیلڈ مارشل سے رابطہ ہوا تھا اور صرف چار روز کے اندر امن معاہدہ طے پا گیا، جس میں امریکا نے بھی مدد فراہم کی۔

اہم پیش رفت کا امکان

ایک سوال کے جواب میں ڈونلڈ ٹرمپ نے کہا کہ امریکی میڈیا کو پاکستان میں موجود ہونا چاہیے کیونکہ آئندہ دو دن میں کچھ بھی ہو سکتا ہے۔

امریکی اخبار کے مطابق ٹرمپ نے ابتدا میں امریکی وفد کے پاکستان جانے کی تردید کی تھی، تاہم بعد ازاں دوبارہ فون کرکے پاکستان میں مذاکرات کے اگلے دور کے حوالے سے اہم اشارہ دیا، جس سے خطے میں نئی سفارتی سرگرمیوں کا امکان ظاہر کیا جا رہا ہے۔