وزیراعلیٰ پنجاب مریم نواز کا کسانوں کیلئے بڑا ریلیف پیکج، 3500 روپے فی من گندم خریداری کا اعلان

(لاہور)مریم نواز نے گندم کے کاشتکاروں کیلئے بڑے ریلیف پیکج کا اعلان کرتے ہوئے 6 ارب روپے مالیت کا باردانہ مفت فراہم کرنے کی منظوری دے دی ہے۔

اعلامیے کے مطابق وزیراعلیٰ پنجاب نے گندم کی خریداری 3500 روپے فی من کے حساب سے فوری شروع کرنے کی ہدایت بھی جاری کر دی ہے۔ رجسٹرڈ کاشتکاروں کو پرچیز سنٹرز سے فی ایکڑ 10 بوری باردانہ فراہم کیا جائے گا۔

کسانوں کیلئے فوری ریلیف اقدامات

پنجاب حکومت نے کسان کارڈ ہولڈرز سے ترجیحی بنیادوں پر گندم خریدنے کا اصولی فیصلہ کیا ہے۔ 3500 روپے فی من کے نرخ پر خریدی گئی گندم کی ادائیگی 72 گھنٹوں کے اندر کاشتکاروں کو یقینی بنانے کی ہدایت بھی جاری کی گئی ہے۔

گندم خریداری کی مانیٹرنگ کیلئے کمیٹیاں قائم

گندم خریداری کے عمل کی شفافیت اور موثر نگرانی کیلئے پنجاب بھر میں اسٹرٹیجک مینجمنٹ کمیٹیاں قائم کر دی گئی ہیں، جو خریداری کے عمل کی مسلسل نگرانی کریں گی۔

نوجوانوں کیلئے انٹرن شپ پروگرام

وزیراعلیٰ پنجاب نے "ورک ود پنجاب گورنمنٹ" پروگرام شروع کرنے کا بھی اعلان کیا، جس کے تحت ایگریکلچر گریجویٹس سمیت دیگر نوجوانوں کو انٹرن شپ کے مواقع فراہم کیے جائیں گے۔

کسان کارڈ اور گرین ٹریکٹر اسکیم میں پیش رفت

بریفنگ میں بتایا گیا کہ پنجاب میں کسان کارڈ کے ذریعے 100 ارب روپے کے قرضوں کے اجرا کا ریکارڈ قائم ہو چکا ہے جبکہ 9 لاکھ کاشتکاروں کی رجسٹریشن جاری ہے۔

گرین ٹریکٹر اسکیم کے تحت 30 ہزار ٹریکٹرز دینے کا ہدف مقرر کیا گیا ہے، جن میں سے 20 ہزار ٹریکٹرز پہلے ہی کاشتکاروں کو فراہم کیے جا چکے ہیں۔

وزیراعلیٰ پنجاب مریم نواز کا کہنا تھا کہ کسان کو کسی صورت متاثر نہیں ہونے دیا جائے گا اور صوبے میں زرعی ترقی کو پائیدار بنیادوں پر استوار کیا جا رہا ہے۔