ایران جنگ ختم ہوتے ہی تیل کی قیمتیں کم ہوں گی، ایران معاہدے کیلئے بے تاب ہے: ٹرمپ

(واشنگٹن) ڈونلڈ ٹرمپ نے کہا ہے کہ ایران معاہدے کیلئے بے تاب ہے اور جنگ کے خاتمے کے ساتھ ہی تیل اور گیس کی قیمتوں میں نمایاں کمی آ جائے گی۔

امریکی صدر نے کہا کہ ایران کو نیوکلیئر ہتھیار رکھنے کی اجازت نہیں دی جائے گی۔ ان کا دعویٰ تھا کہ ایران کی بحریہ اور فضائیہ تقریباً ختم ہو چکی ہے جبکہ اس کی معیشت بھی شدید دباؤ کا شکار ہے۔

ڈونلڈ ٹرمپ کے مطابق امریکی بی ٹو بمبار طیاروں نے ایران کی جوہری تنصیبات کو تباہ کر دیا ہے اور گزشتہ جون کے حملوں نے ایران کی جوہری صلاحیت کو شدید نقصان پہنچایا۔

انہوں نے کہا کہ ایران کے ساتھ وہی حکمت عملی اختیار کی جا رہی ہے جو وینزویلا کے ساتھ اپنائی گئی تھی اور تمام معاملات بہتر انداز میں آگے بڑھ رہے ہیں۔

ٹرمپ نے دعویٰ کیا کہ ایران کے 159 بحری جہاز سمندر کی تہہ میں جا چکے ہیں اور ایران نے 42 ہزار افراد کو قتل کیا۔ انہوں نے یہ بھی کہا کہ ایران میں 8 خواتین کو پھانسی دی جانے والی تھی لیکن انہوں نے ان کی جان بچائی۔

امریکی صدر کا کہنا تھا کہ ایران جنگ ختم ہوتے ہی عالمی منڈی میں تیل اور گیس کی قیمتیں کم ہو جائیں گی۔ انہوں نے مزید کہا کہ نیٹو ممالک نے امریکا کی مدد نہیں کی جبکہ جرمن چانسلر کی کارکردگی بھی مایوس کن رہی۔

ڈونلڈ ٹرمپ نے کہا کہ ممکن ہے جرمنی، اٹلی اور اسپین سے امریکی فوج واپس بلا لی جائے۔

انہوں نے یہ بھی دعویٰ کیا کہ انہوں نے آٹھ جنگیں رکوا دیں، جن میں پاکستان اور بھارت کے درمیان ممکنہ بڑی جنگ بھی شامل تھی۔