چینی و امریکی وزرائے خارجہ کا رابطہ، مشرق وسطیٰ اور تائیوان پر اہم گفتگو

(بیجنگ)وانگ ژی اور امریکی وزیر خارجہ مارکو روبیو کے درمیان ٹیلیفونک رابطہ ہوا، جس میں تائیوان، دوطرفہ تعلقات اور مشرق وسطیٰ کی صورتحال پر تفصیلی گفتگو کی گئی۔

چینی میڈیا کے مطابق گفتگو کے دوران وانگ ژی نے کہا کہ تائیوان کا مسئلہ چین کے بنیادی مفاد سے جڑا ہوا ہے اور امریکا کو اپنے وعدوں پر قائم رہتے ہوئے درست انتخاب کرنا چاہیے۔

چینی وزیر خارجہ کا کہنا تھا کہ چین اور امریکا کے تعلقات مجموعی طور پر مستحکم رہے ہیں، تاہم دونوں ممالک کو تعاون بڑھانے اور اختلافات کو کم کرنے کیلئے سنجیدہ اقدامات کرنا ہوں گے۔

رپورٹس کے مطابق دونوں وزرائے خارجہ نے مشرق وسطیٰ میں جاری کشیدگی، علاقائی سلامتی اور سفارتی کوششوں پر بھی تبادلہ خیال کیا۔

وانگ ژی نے اس موقع پر زور دیا کہ عالمی امن و استحکام کیلئے بڑی طاقتوں کے درمیان ذمہ دارانہ سفارت کاری ناگزیر ہے جبکہ اختلافات کے باوجود رابطے اور مذاکرات کا سلسلہ جاری رہنا چاہیے۔