پاکستانی بحری جہاز"خیرپور" آبنائے ہرمز سے نکل گیا، 58 ہزار میٹرک ٹن پیٹرول پاکستان لا رہا ہے

(کراچی) پاکستان نیشنل شپنگ کارپوریشن کا بحری جہاز "خیرپور" آبنائے ہرمز اور امریکی ناکہ بندی عبور کر کے بحفاظت پاکستان کی جانب روانہ ہو گیا ہے۔

شپنگ ذرائع کے مطابق پی این ایس سی کا جہاز خیرپور 58 ہزار میٹرک ٹن پیٹرول لے کر پاکستان آ رہا ہے۔ یہ جہاز کویت کی بندرگاہ سے تیل لے کر روانہ ہوا تھا اور اب آبنائے ہرمز پار کر چکا ہے۔

ذرائع کا کہنا ہے کہ خیرپور نامی جہاز آئندہ دو سے تین روز میں پاکستان پہنچ جائے گا، جس سے ملک میں پیٹرول کی فراہمی مزید مستحکم ہونے کی توقع ہے۔

یہ امریکی ناکہ بندی کے بعد دوسرا پاکستانی بحری جہاز ہے جو آبنائے ہرمز سے کامیابی کے ساتھ نکلنے میں کامیاب ہوا ہے۔

حکام کے مطابق بحری جہاز کی محفوظ آمد توانائی سپلائی چین کے تسلسل کیلئے اہم پیش رفت قرار دی جا رہی ہے، جبکہ ملکی پیٹرول ذخائر کو بھی اس سے تقویت ملے گی۔