پاکستان اور چین کے درمیان متعدد مفاہمتی یادداشتوں اور معاہدوں پر دستخط

(چین) آصف علی زرداری کی موجودگی میں پاکستان اور چین کے مختلف اداروں کے درمیان مفاہمتی یادداشتوں اور معاہدوں پر دستخط کی تقریب منعقد ہوئی۔

تقریب میں صدر پاکستان کے علاوہ سید قاسم نوید قمر، چیف سیکرٹری سندھ علی حسن بروہی اور پاکستان کے سفیر خلیل ہاشمی بھی موجود تھے۔

دونوں ممالک کے درمیان تعمیراتی مشینری، صحتِ حیوانات اور میڈیکل ٹیکنالوجی سے متعلق مختلف معاہدوں پر دستخط کیے گئے۔ سہ فریقی تعاون کے تحت سی پیک سے متعلق تعمیراتی مشینری اور آلات کی فراہمی کو فروغ دیا جائے گا جبکہ پاکستان میں فیکٹریوں کے قیام کیلئے سرمایہ کاری کے مواقع کا بھی جائزہ لیا جائے گا۔

تقریب کے آغاز میں پاک چین 75 سالہ دوستی پر مبنی ایک خصوصی دستاویزی فلم بھی دکھائی گئی۔

الحسن ٹریڈ اسٹیبلشمنٹ، سینی انٹرنیشنل ڈویلپمنٹ اور ہینان جیالونگ انٹرنیشنل ٹیکنالوجی کے درمیان بھی مفاہمتی یادداشت پر دستخط ہوئے۔ اس موقع پر سلیم مانڈوی والا سمیت دیگر حکام شریک تھے۔

حیوانات کیلئے ویکسین، خصوصاً منہ کھر ویکسین کی فراہمی کیلئے مشترکہ منصوبے کا معاہدہ بھی طے پایا، جس میں پاکستان میں جانوروں کیلئے ٹریک اور ٹریس ایبلٹی سسٹمز کے نفاذ پر تعاون شامل ہے۔

اس معاہدے پر شرجیل انعام میمن اور لوئیانگ ماڈرن ٹیکنالوجی گروپ کے چیئرمین وانگ شانپو نے دستخط کیے۔

مزید برآں ڈاکٹر ضیاء الدین ہسپتال اور شینزن وی بانگ ٹیکنالوجی کے درمیان بھی مفاہمتی یادداشت پر دستخط ہوئے، جس کا مقصد کلینیکل میڈیسن میں ذہین روبوٹس کے جدید استعمال کو فروغ دینا ہے۔