عوام بجلی بچائیں، 10 کے بجائے صرف 2 بلب جلائیں: ایرانی صدر مسعود پزشکیان

(تہران) ایرانی صدر مسعود پزشکیان نے شہریوں سے بجلی کی بچت کی اپیل کرتے ہوئے کہا ہے کہ عوام گھروں میں 10 بلب جلانے کے بجائے صرف 2 بلب جلائیں تاکہ توانائی کے استعمال میں احتیاط کی جا سکے۔

سوشل میڈیا پر جاری اپنے بیان میں مسعود پزشکیان نے کہا کہ دشمن ایران کی بنیادی تنصیبات کو نشانہ بنا رہے ہیں اور ملک کو گھیرنے کی کوشش کی جا رہی ہے تاکہ عوام میں بے چینی پیدا ہو۔

انہوں نے کہا کہ ایسے حالات میں عوام کو ذمہ داری کا مظاہرہ کرنا ہوگا اور بجلی کے غیر ضروری استعمال سے گریز کرنا ہوگا۔ صدر نے واضح کیا کہ عوام سے کسی بڑی قربانی کا مطالبہ نہیں کیا جا رہا بلکہ صرف احتیاط اور تعاون کی ضرورت ہے۔

ایرانی صدر نے اپنے ایک اور بیان میں کہا کہ 25 اپریل، طبس میں امریکا کی تاریخی شکست کی سالگرہ ہے، جب یہ ثابت ہو گیا تھا کہ اللہ تمام دوسری قوتوں پر غالب ہے۔

انہوں نے کہا کہ جس طرح 1980 میں طبس میں امریکی آپریشن ناکام ہوا تھا، اسی طرح اس سال اصفہان میں بھی تاریخ رقم ہوئی ہے، اور ایسی شکستیں ظالم قوتوں کیلئے عبرت کا سامان بنتی ہیں۔

مسعود پزشکیان کے مطابق یہ تاریخی واقعات ثابت کرتے ہیں کہ بیرونی دباؤ اور جارحیت کے باوجود ایران اپنے عزم پر قائم ہے۔