سعودی عرب کا پاکستان کیلئے 3 ارب ڈالر اضافی مالیاتی تعاون کا اعلان
سعودی عرب نے پاکستان کیلئے 3 ارب ڈالر اضافی مالیاتی معاونت کا اعلان کر دیا جبکہ موجودہ 5 ارب ڈالر کے ڈپازٹ میں بھی توسیع کر دی گئی ہے، جسے پاکستان کی معیشت کیلئے اہم پیش رفت قرار دیا جا رہا ہے۔
(واشنگٹن ) وفاقی وزیر خزانہ سینیٹر محمد اورنگزیب نے واشنگٹن ڈی سی میں ورلڈ بینک اور آئی ایم ایف کے بہار اجلاس 2026 کے موقع پر میڈیا سے گفتگو کرتے ہوئے بتایا کہ سعودی عرب نے پاکستان کیلئے مزید 3 ارب ڈالر کے ڈپازٹس کی منظوری دے دی ہے، جن کی ادائیگی آئندہ ہفتے متوقع ہے۔
وزارت خزانہ کے مطابق سعودی عرب کا موجودہ 5 ارب ڈالر کا ڈپازٹ اب سالانہ بنیاد پر رول اوور کا پابند نہیں رہے گا بلکہ اسے طویل مدت کیلئے بڑھا دیا گیا ہے، جس سے پاکستان کے زرمبادلہ ذخائر کو تقویت ملے گی۔
وزیر خزانہ محمد اورنگزیب نے کہا کہ یہ مالی معاونت پاکستان کی بیرونی فنانسنگ ضروریات کیلئے نہایت اہم وقت پر فراہم کی گئی ہے، جس سے بیرونی کھاتوں کو مستحکم کرنے میں مدد ملے گی۔ انہوں نے کہا کہ حکومت آئی ایم ایف پروگرام کے تحت ذخائر کو تقریباً 18 ارب ڈالر تک لے جانے کیلئے پرعزم ہے جو تقریباً 3.3 ماہ کی درآمدات کے برابر ہوں گے۔
انہوں نے بتایا کہ پاکستان نے گزشتہ ہفتے 1.4 ارب ڈالر کا یورو بانڈ کامیابی سے واپس کیا، جسے انہوں نے ’نان ایونٹ‘ قرار دیتے ہوئے کہا کہ حکومت تمام بیرونی ادائیگیاں بروقت مکمل کرنے کیلئے پرعزم ہے۔
وزیر خزانہ نے مزید بتایا کہ واشنگٹن میں انہوں نے سٹیٹ بینک آف پاکستان کے گورنر اور امریکا میں پاکستان کے سفیر کے ہمراہ سعودی وزیر خزانہ محمد بن عبداللہ الجدان سے ملاقات کی، جس میں مالی تعاون کے امور پر تفصیلی تبادلہ خیال کیا گیا۔
انہوں نے سعودی قیادت، خصوصاً ولی عہد شہزادہ محمد بن سلمان اور سعودی وزیر خزانہ محمد بن عبداللہ الجدان کا شکریہ ادا کرتے ہوئے کہا کہ سعودی عرب کی مسلسل حمایت پاکستان کیلئے انتہائی اہم ہے۔
محمد اورنگزیب نے کہا کہ پاکستان کو عالمی مالیاتی اداروں، آئی ایم ایف، ورلڈ بینک اور سرمایہ کاروں کی جانب سے مثبت ردعمل مل رہا ہے جبکہ حکومت گلوبل میڈیم ٹرم نوٹ پروگرام اور پانڈا بانڈ کے اجرا پر بھی کام کر رہی ہے تاکہ فنڈنگ کے ذرائع کو مزید متنوع بنایا جا سکے۔
Web Desk
Media Channel
شائع ہوا: 15 اپریل، 2026 کو 04:18 AM
آخری تدوین: 15 اپریل، 2026
