حکومت نے پٹرولیم لیوی میں بڑا اضافہ کر دیا، پٹرول اور ڈیزل مزید مہنگے

(اسلام آباد) حکومت نے پٹرولیم مصنوعات پر عائد لیوی کی شرح میں بڑا اضافہ کر دیا ہے، جس کے بعد پٹرول اور ڈیزل کی قیمتوں میں مزید اضافہ ہوگیا۔

حکومت کی جانب سے پٹرول اور ہائی اسپیڈ ڈیزل پر پٹرولیم لیوی میں 13 روپے 91 پیسے فی لٹر اضافہ کیا گیا ہے۔ اضافے کے بعد پٹرول پر لیوی 117 روپے 41 پیسے فی لٹر مقرر کر دی گئی۔

نوٹیفکیشن کے مطابق ہائی اسپیڈ ڈیزل پر پٹرولیم لیوی 42 روپے 60 پیسے فی لٹر کر دی گئی ہے، جبکہ ہائی اسپیڈ ڈیزل پر فریٹ مارجن میں 9 روپے 38 پیسے فی لٹر کمی بھی کی گئی ہے۔ اس کمی کے بعد فریٹ مارجن 7 روپے 75 پیسے فی لٹر مقرر کیا گیا ہے۔

اس سے قبل حکومت نے پٹرولیم مصنوعات کی قیمتوں میں بھی اضافہ کیا تھا۔ جاری کردہ نوٹیفکیشن کے مطابق پٹرول کی قیمت میں 14 روپے 92 پیسے جبکہ ڈیزل کی قیمت میں 15 روپے فی لٹر اضافہ کیا گیا۔

اضافے کے بعد پٹرول کی نئی قیمت 414 روپے 78 پیسے فی لٹر جبکہ ہائی اسپیڈ ڈیزل کی قیمت 414 روپے 58 پیسے فی لٹر مقرر کر دی گئی ہے۔

ماہرین کے مطابق پٹرولیم مصنوعات پر لیوی میں اضافے سے ٹرانسپورٹ اور اشیائے ضروریہ کی قیمتوں پر مزید دباؤ پڑنے کا امکان ہے۔