ون کانسٹیٹیوشن بڑا گھپلا، ذمہ داروں کے خلاف کارروائی ہونی چاہیے: محسن نقوی

صحافیوں سے گفتگو کرتے ہوئے محسن نقوی نے کہا کہ ون کانسٹیٹیوشن کے حوالے سے ان کا مؤقف شروع سے واضح ہے اور سی ڈی اے بھی اسے غیر قانونی قرار دے چکی ہے۔ انہوں نے کہا کہ اس معاملے کی تحقیقات کے لیے کمیٹی تشکیل دی جا چکی ہے اور اس کے سامنے بھی یہی مؤقف پیش کیا جائے گا۔

وزیر داخلہ کا کہنا تھا کہ قانون سب کے لیے برابر ہے اور ایسا نہیں ہو سکتا کہ امیر اور غریب کے لیے الگ الگ قانون ہو۔ انہوں نے کہا کہ پاکستان کی تاریخ میں شاید ہی اتنا بڑا مالی اسکینڈل سامنے آیا ہو۔

محسن نقوی نے دعویٰ کیا کہ اس معاملے میں سیاستدانوں، بیوروکریٹس، ججز اور بینکرز سمیت مختلف طبقات کے لوگ شامل رہے، اور گزشتہ 21 سالوں سے یہ سلسلہ جاری تھا۔

انہوں نے زور دیتے ہوئے کہا کہ صرف عمارت پر توجہ دینے کے بجائے ان افراد کے خلاف کارروائی کی جانی چاہیے جنہوں نے ملک کو نقصان پہنچایا، تاکہ مستقبل میں ایسے واقعات کی روک تھام ممکن ہو سکے۔