پاکستان کی کوششوں سے مذاکرات میں پیشرفت ہو رہی ہے امریکا جنگ سے گریز کرے: عباس عراقچی

ایران کے وزیر خارجہ عباس عراقچی نے کہا ہے کہ پاکستان کی سفارتی کوششوں کے باعث جاری مذاکرات میں مثبت پیشرفت دیکھنے میں آ رہی ہے، جسے خطے میں کشیدگی کم کرنے کی ایک اہم پیش رفت قرار دیا جا رہا ہے۔

اپنے بیان میں انہوں نے کہا کہ آبنائے ہرمز میں پیش آنے والے حالیہ واقعات نے یہ واضح کر دیا ہے کہ کسی بھی سیاسی بحران کا حل فوجی کارروائی نہیں ہوتا۔ انہوں نے امریکا کو خبردار کیا کہ وہ کسی کے بہکاوے میں آ کر دوبارہ جنگ کے دلدل میں نہ پھنسے۔

عباس عراقچی کا کہنا تھا کہ امریکا کو ان عناصر سے محتاط رہنا چاہیے جو اسے ایک بار پھر تنازع میں دھکیلنا چاہتے ہیں۔ انہوں نے متحدہ عرب امارات کو بھی احتیاط برتنے کا مشورہ دیتے ہوئے کہا کہ "پراجیکٹ فریڈم" دراصل "پراجیکٹ ڈیڈلاک" ہے۔

دوسری جانب ایرانی میڈیا نے دعویٰ کیا ہے کہ امریکی فوج نے دو سویلین کشتیوں کو نشانہ بنایا، جس کے نتیجے میں پانچ شہری جاں بحق ہوئے۔ اس واقعے کے بعد خطے میں کشیدگی مزید بڑھنے کے خدشات ظاہر کیے جا رہے ہیں، جبکہ سفارتی سطح پر کوششیں تیز ہو گئی ہیں تاکہ صورتحال کو مزید بگڑنے سے روکا جا سکے۔