190 ملین پاؤنڈ کیس: عمران خان اور بشریٰ بی بی کی سزا معطلی کی درخواستیں غیر مؤثر قرار

(اسلام آباد)اسلام آباد ہائیکورٹ نے 190 ملین پاؤنڈ کیس میں عمران خان اور ان کی اہلیہ بشریٰ بی بی کی سزا معطلی کے لیے دائر درخواستوں کو غیر مؤثر قرار دے کر نمٹا دیا ہے۔

عدالت نے اپنے فیصلے میں کہا کہ چونکہ اس کیس میں دائر مرکزی اپیلوں پر باقاعدہ سماعت شروع ہونے جا رہی ہے، اس لیے سزا معطلی کی علیحدہ درخواستوں کی اہمیت ختم ہو چکی ہے۔ اس بنیاد پر عدالت نے ان درخواستوں کو غیر مؤثر قرار دیا۔

اسلام آباد ہائیکورٹ نے مرکزی اپیلوں کی سماعت کے لیے 7 مئی کی تاریخ مقرر کر دی ہے۔ اس موقع پر چیف جسٹس سرفراز ڈوگر کی سربراہی میں قائم دو رکنی بینچ کیس کی مکمل سماعت کرے گا۔

سماعت کے دوران بانی پی ٹی آئی اور بشریٰ بی بی کے وکلاء نے مؤقف اختیار کیا تھا کہ سزا معطلی کی درخواستوں کو مرکزی اپیلوں سے پہلے سنا جائے، تاہم عدالت نے اس استدعا کو مسترد کر دیا۔ عدالت کا کہنا تھا کہ جب مرکزی اپیلیں سماعت کے لیے مقرر ہو جائیں تو سزا معطلی کی درخواستیں اپنی قانونی حیثیت کھو دیتی ہیں۔

فیصلے کے نتیجے میں بشریٰ بی بی کی جانب سے دائر سزا معطلی کی درخواست بھی غیر مؤثر قرار دے کر ختم کر دی گئی ہے۔

واضح رہے کہ اس مقدمے میں احتساب عدالت نے عمران خان کو 14 سال قید اور 10 لاکھ روپے جرمانے کی سزا سنائی تھی، جبکہ بشریٰ بی بی کو سات سال قید اور پانچ لاکھ روپے جرمانے کا حکم دیا گیا تھا۔