اسحاق ڈار اور عباس عراقچی کا رابطہ، خطے میں امن کے لیے سفارتکاری پر زور

(اسلام آباد)نائب وزیر اعظم و وزیر خارجہ محمد اسحاق ڈار اور ایران کے وزیر خارجہ سید عباس عراقچی کے درمیان ٹیلیفونک رابطہ ہوا ہے، جس میں خطے کی مجموعی صورتحال اور امن و استحکام کے فروغ کے لیے جاری سفارتی کوششوں پر تبادلہ خیال کیا گیا۔

ترجمان دفتر خارجہ کے مطابق دونوں رہنماؤں نے موجودہ علاقائی پیش رفت پر تفصیلی گفتگو کی اور مختلف امور پر اپنے خیالات کا اظہار کیا۔ اس موقع پر ایرانی وزیر خارجہ نے مختلف فریقین کے درمیان مثبت اور تعمیری کردار ادا کرنے پر پاکستان کی کوششوں کو سراہا، جبکہ ثالثی کے حوالے سے اسلام آباد کی سنجیدہ کاوشوں کی بھی تعریف کی۔

گفتگو کے دوران اسحاق ڈار نے اس عزم کا اعادہ کیا کہ پاکستان خطے میں تعمیری روابط کے فروغ اور کشیدگی میں کمی کے لیے اپنی سفارتی کوششیں جاری رکھے گا۔ انہوں نے اس بات پر زور دیا کہ مسائل کا پائیدار حل صرف مکالمے اور سفارتکاری کے ذریعے ہی ممکن ہے، اور یہی راستہ دیرپا امن و استحکام کی ضمانت فراہم کرتا ہے۔

دفتر خارجہ کے مطابق پاکستان خطے میں تعاون کے فروغ اور تنازعات کے پرامن حل کے لیے اپنا فعال کردار ادا کرتا رہے گا۔

یاد رہے کہ گزشتہ روز پاکستان میں تعینات ایرانی سفیر رضا امیری مقدم نے ایک انٹرویو میں کہا تھا کہ امریکا کے ساتھ مذاکرات میں پاکستان کی ثالثی کی کوششوں کو سراہا جاتا ہے، اور بطور ثالث ملک پاکستان کو تبدیل کرنے کا کوئی فیصلہ نہیں کیا گیا۔