ایران جنگ نہیں چاہتا لیکن اپنے حقوق سے دستبردار نہیں ہوگا ایرانی سپریم لیڈر مجتبیٰ خامنہ ای

(ایران) ایرانی میڈیا کے مطابق مجتبیٰ خامنہ ای نے اپنے بیان میں کہا کہ ایران خطے میں امن کا خواہاں ہے، لیکن قومی مفادات اور خودمختاری پر کوئی سمجھوتہ نہیں کیا جائے گا۔ انہوں نے کہا کہ ہم اب بھی اپنے جنوبی پڑوسیوں کے مناسب ردعمل کے منتظر ہیں تاکہ بھائی چارے اور تعاون کا مظاہرہ کیا جا سکے۔

ایرانی سپریم لیڈر نے عوام سے اپیل کرتے ہوئے کہا کہ سڑکوں پر عوام کی موجودگی 40 دنوں کی طرح برقرار رہنی چاہیے، جبکہ آبنائے ہرمز کے انتظام کو نئے مرحلے میں لے جانے کا بھی عندیہ دیا۔

ادھر جنگ بندی کے بعد امریکا اور ایران کے درمیان مذاکرات کا پہلا دور ہفتے کو اسلام آباد میں ہونے کا امکان ہے، جس میں خطے کی صورتحال اور کشیدگی میں کمی کے اقدامات زیر غور آئیں گے۔

دوسری جانب برطانوی اخبار "دی ٹائمز" نے مجتبیٰ خامنہ ای سے متعلق بڑا دعویٰ کیا ہے۔ رپورٹ کے مطابق مجتبیٰ خامنہ ای مبینہ طور پر بے ہوش ہیں اور ایرانی شہر قم میں زیر علاج ہیں۔

رپورٹ میں یہ بھی کہا گیا ہے کہ مجتبیٰ خامنہ ای تاحال کسی بھی حکومتی فیصلے میں شامل نہیں اور ان کی حالت پہلے کے اندازوں سے زیادہ نازک بتائی جا رہی ہے۔ اس سے قبل بھی میڈیا رپورٹس میں دعویٰ کیا گیا تھا کہ وہ امریکا اور اسرائیل کے حملوں میں زخمی ہوئے تھے۔

تاہم ایرانی سرکاری میڈیا کی جانب سے مجتبیٰ خامنہ ای کے پیغامات جاری کیے گئے ہیں، لیکن وہ اب تک عوام کے سامنے نہیں آئے، جس سے قیاس آرائیوں میں مزید اضافہ ہو گیا ہے۔