وزیراعظم شہباز شریف سے ایرانی وفد کی ملاقات، امن کیلئے ثالثی کردار جاری رکھنے کے عزم کا اعادہ

(اسلام آباد) وزیراعظم شہباز شریف سے اسلام آباد میں جاری امن مذاکرات کے موقع پر ایرانی اعلیٰ سطحی وفد نے ملاقات کی جس میں خطے کی صورتحال اور امن کوششوں پر تفصیلی تبادلہ خیال کیا گیا۔

ایرانی وفد کی قیادت محمد باقر قالیباف کر رہے تھے جبکہ ایرانی وزیر خارجہ عباس عراقچی بھی وفد میں شامل تھے۔

ملاقات کے دوران وزیراعظم شہباز شریف نے اسلام آباد مذاکرات میں ایران کی شمولیت کو سراہتے ہوئے کہا کہ پاکستان خطے اور دنیا میں امن و استحکام کیلئے بامعنی نتائج کے حصول کیلئے اپنی ثالثی کا کردار خلوص نیت سے جاری رکھے گا۔ انہوں نے اس عزم کا اعادہ کیا کہ پاکستان مذاکرات کے ذریعے تنازعات کے حل کو ترجیح دیتا ہے۔

ملاقات میں پاکستانی وفد کی جانب سے نائب وزیراعظم و وزیر خارجہ محمد اسحاق ڈار، فیلڈ مارشل سید عاصم منیر اور وفاقی وزیر داخلہ محسن نقوی بھی شریک تھے۔

ملاقات کے دوران فریقین نے جاری مذاکرات کو خطے میں امن کیلئے اہم قرار دیا اور امید ظاہر کی کہ اسلام آباد میں ہونے والی بات چیت سے کشیدگی کم کرنے میں مدد ملے گی۔

واضح رہے کہ ایران اور امریکا کے درمیان اہم مذاکرات کیلئے دونوں ممالک کے وفود اسلام آباد میں موجود ہیں جبکہ پاکستان ثالثی کا اہم کردار ادا کر رہا ہے۔