اسلام آباد مذاکرات سے جنگ کے شعلے امن میں بدل گئے، وزیراعظم شہباز شریف

(اسلام آباد)کابینہ اجلاس کے دوران نائب وزیراعظم اسحاق ڈار اور فیلڈ مارشل سید عاصم منیر کو خراج تحسین پیش کیا گیا، جبکہ کابینہ ارکان نے تالیاں بجا کر ان کی خدمات کو سراہا۔

وزیراعظم شہباز شریف نے اجلاس سے خطاب کرتے ہوئے کہا کہ پاکستان نے 47 سال بعد ایران اور امریکا کے درمیان مذاکرات کا آغاز کرایا اور پہلی مرتبہ پاکستان میں اعلیٰ سطح کے مذاکرات ہوئے۔ انہوں نے کہا کہ پاکستان نے ایران امریکا مذاکرات میں اہم اور مثبت کردار ادا کیا۔

وزیراعظم نے کہا کہ پاکستان کی درخواست پر ایران اور امریکا کے وفود اسلام آباد آئے جس پر وہ دونوں ممالک کی قیادت کے شکر گزار ہیں۔ ان کا کہنا تھا کہ اسلام آباد میں مذاکرات 21 گھنٹے تک جاری رہے اور پہلی مرتبہ امریکا اور ایران کے وفود آمنے سامنے بیٹھے۔

شہباز شریف نے کہا کہ مذاکرات کے دوران دنیا بھر کی نظریں اسلام آباد پر تھیں اور پاکستان کو امن کی بحالی کے لیے ثالثی کا اہم موقع ملا۔ انہوں نے بتایا کہ جاپان سمیت مختلف ممالک کے سربراہان نے پاکستان کی کوششوں کو سراہا۔

وزیراعظم نے مزید کہا کہ اسلام آباد مذاکرات کے ذریعے پاکستان کو جنگ بندی کو مستقل امن میں تبدیل کرنے کا موقع ملا ہے۔ انہوں نے کہا کہ یہ تاریخی لمحہ وطن عزیز کے 24 کروڑ عوام کے لیے باعث فخر ہے اور پاکستان خطے میں امن کے قیام کے لیے اپنی سفارتی کوششیں جاری رکھے گا۔