ایرانی وزیر خارجہ عباس عراقچی اسلام آباد پہنچ گئے، اعلیٰ قیادت سے اہم ملاقاتیں متوقع

(اسلام آباد)ترجمان دفتر خارجہ کے مطابق نائب وزیراعظم، فیلڈ مارشل سید عاصم منیر اور دیگر اعلیٰ حکام نے ایرانی وزیر خارجہ کا استقبال کیا۔ دورے کے دوران عباس عراقچی پاکستان کی سیاسی اور عسکری قیادت سے ملاقاتیں کریں گے۔

ترجمان کے مطابق ملاقاتوں میں خطے کی موجودہ صورتحال، علاقائی امن و استحکام اور جاری سفارتی کوششوں پر تفصیلی تبادلہ خیال کیا جائے گا۔

اس سے قبل عباس عراقچی نے اپنے دورہ پاکستان کا باضابطہ اعلان کرتے ہوئے سماجی رابطے کی ویب سائٹ ایکس پر کہا تھا کہ وہ اسلام آباد کے بعد مسقط اور پھر ماسکو کا بھی دورہ کریں گے۔

انہوں نے کہا کہ ہمارے پڑوسی ہماری اولین ترجیح ہیں اور علاقائی صورتحال کے ساتھ ساتھ دوطرفہ امور پر مشاورت کیلئے یہ دورہ کیا جا رہا ہے۔

ایرانی وزیر خارجہ کا یہ دورہ ایسے وقت میں ہو رہا ہے جب خطے میں کشیدگی برقرار ہے اور امریکا ایران مذاکرات کے دوسرے مرحلے کیلئے اسلام آباد کو اہم سفارتی مرکز قرار دیا جا رہا ہے۔