شمالی بحیرہ عرب میں پاک بحریہ کا کامیاب ریسکیو آپریشن،

(کراچی )تفصیلات کے مطابق تجارتی بحری جہاز "ایم وی گولڈ آٹم" سے ہنگامی سگنل موصول ہونے کے بعد فوری کارروائی عمل میں لائی گئی۔ یہ جہاز پاکستانی ساحل سے تقریباً 200 ناٹیکل میل (370 کلومیٹر) جنوب میں موجود تھا۔ ریسکیو کیے گئے افراد میں چین، بنگلہ دیش، میانمار، ویتنام اور انڈونیشیا کے شہری شامل ہیں۔

ہنگامی اطلاع ملتے ہی پاکستان میری ٹائم سکیورٹی ایجنسی نے میری ٹائم ریسکیو کوآرڈینیشن سینٹر کو فعال کیا اور پاک بحریہ کے جہاز پی این ایس حنین کو فوری امدادی کارروائی کے لیے روانہ کیا گیا، جو اس وقت سمندری حدود کی نگرانی پر مامور تھا۔

پی این ایس حنین نے موقع پر پہنچ کر پیشہ ورانہ مہارت کا مظاہرہ کرتے ہوئے جہاز پر لگی آگ بجھانے میں مدد فراہم کی، متاثرہ افراد کو فوری طبی امداد دی اور عملے کو بحفاظت ریسکیو کر لیا۔ پاک بحریہ کی ٹیم نے جہاز کو پہنچنے والے نقصانات کا بھی جائزہ لیا۔

ریسکیو کیے گئے افراد کو مزید طبی امداد اور بعد ازاں اپنے ممالک واپسی کے لیے کراچی منتقل کر دیا گیا ہے۔ پاک بحریہ کی جانب سے انسانی ہمدردی کی بنیاد پر کی گئی یہ کارروائی پاکستان کی سمندری حدود میں مؤثر نگرانی اور فوری امدادی صلاحیتوں کی عکاس ہے۔

پاک بحریہ نے اس عزم کا اعادہ کیا ہے کہ وہ کسی بھی ہنگامی صورتحال میں بروقت اور مؤثر امداد فراہم کرنے کے لیے ہمیشہ تیار ہے۔