شہباز شریف سے پاکستانی خلا بازوں کی ملاقات، خلائی مشن کو تاریخی سنگ میل قرار

(اسلام آباد) شہباز شریف سے پاکستانی خلا بازوں خرم داؤد اور محمد ذیشان علی نے ملاقات کی، جس میں وزیراعظم نے اس خلائی مشن کو پاکستان کے لیے ایک تاریخی سنگ میل قرار دیا۔

ملاقات کے دوران اتاشی حسنین افتخار بھی موجود تھے۔ وزیراعظم نے خلا بازوں سے گفتگو کرتے ہوئے کہا کہ ان کا مشن پوری قوم کے لیے باعثِ فخر ہے اور یہ پاکستان کی تاریخ میں ایک نیا باب رقم کرے گا۔

وزیراعظم شہباز شریف نے کہا کہ خلا بازوں کی محنت، لگن اور عزم قابلِ ستائش ہے، اور چینی تعاون سے یہ مشن دونوں ممالک کے برادرانہ تعلقات کو مزید مضبوط بنائے گا۔ انہوں نے چین کے ساتھ خلائی تحقیق میں تعاون کو مزید وسعت دینے کی امید بھی ظاہر کی۔

اس موقع پر چین کے سفیر جیانگ زائیڈونگ نے وزیراعظم کے خیالات کا خیرمقدم کرتے ہوئے پاکستان اور چین کے درمیان خلائی تعاون کو خوش آئند قرار دیا۔

خلا بازوں نے اس عزم کا اظہار کیا کہ وہ اس منفرد موقع کو پاکستان کے لیے اعزاز بنائیں گے اور اپنی کارکردگی سے قوم کی توقعات پر پورا اترنے کی بھرپور کوشش کریں گے۔

ملاقات میں اسحاق ڈار، احسن اقبال، عطا اللہ تارڑ، طارق فاطمی، آمنہ بلوچ اور محمد یوسف خان بھی شریک تھے۔