پاکستان بچوں کی اموات میں کمی لانے والے پانچ بڑے ممالک میں شامل

(اسلام آباد)رپورٹ میں بتایا گیا ہے کہ ویکسینیشن کے مؤثر نظام کے باعث پاکستان میں 26 لاکھ بچوں کو قابلِ تدارک بیماریوں سے بچا کر ان کی جانیں محفوظ بنائی گئیں۔ ویکسینیشن مہم کے نتیجے میں چیچک کا مکمل خاتمہ ممکن ہوا جبکہ پولیو کے کیسز میں 99.8 فیصد کمی ریکارڈ کی گئی ہے۔

عالمی ادارہ صحت کے مطابق ملک کے 80 فیصد علاقوں میں نوزائیدہ بچوں کو تشنج سے بچانے میں بھی کامیابی حاصل ہوئی ہے۔ پاکستان میں 24 اپریل سے یکم مئی تک عالمی ہفتہ ویکسین بھی منایا جا رہا ہے۔

رپورٹ کے مطابق پاکستان نے 1976 میں چیچک کے خاتمے کے بعد حفاظتی ٹیکہ جات کا پروگرام شروع کیا، جس کے تحت توسیعی پروگرام برائے حفاظتی ٹیکہ جات (EPI) نے بچوں اور ماؤں کی اموات میں نمایاں کمی لانے میں اہم کردار ادا کیا۔

اعداد و شمار کے مطابق اب تک ویکسینیشن کے ذریعے 16 کروڑ بچوں اور 13 کروڑ ماؤں کی زندگیاں محفوظ بنائی جا چکی ہیں۔ پاکستان میں 1996 میں جہاں پولیو کے 20 ہزار کیسز سامنے آئے تھے، وہیں مسلسل ویکسینیشن کے نتیجے میں 2025 میں یہ تعداد کم ہو کر صرف 31 رہ گئی۔

رپورٹ میں مزید بتایا گیا ہے کہ پاکستان میں اس وقت 13 مختلف بیماریوں سے بچاؤ کی ویکسین مفت فراہم کی جا رہی ہے، جبکہ گاوی کے تعاون سے ہر سال 70 لاکھ بچوں اور 55 لاکھ خواتین کی ویکسینیشن کی جاتی ہے۔

پولیو سے بچاؤ کیلئے سالانہ تقریباً ساڑھے چار کروڑ بچوں کو ویکسین دی جاتی ہے، جس کیلئے 15 ہزار سے زائد ویکسینیٹرز اور چار لاکھ سے زیادہ ورکرز خدمات انجام دیتے ہیں، جو دنیا کی سب سے بڑی ہیلتھ ورکر فورسز میں شمار ہوتی ہے۔