ایچ آئی وی کے پھیلاؤ کی روک تھام کیلئے فوری اور مؤثر اقدامات ناگزیر ہیں، مصطفیٰ کمال

(اسلام آباد) وفاقی وزیر صحت مصطفیٰ کمال کی زیر صدارت ایچ آئی وی کی روک تھام اور کنٹرول کے حوالے سے ایک اعلیٰ سطحی اجلاس منعقد ہوا، جس میں وفاقی سیکرٹری صحت، ایڈیشنل سیکرٹری ہیلتھ، سی ای او ڈریپ، وائس چانسلر ہیلتھ سروسز اکیڈمی سمیت متعلقہ اداروں اور اہم اسٹیک ہولڈرز نے شرکت کی۔

اجلاس کے دوران ملک میں ایچ آئی وی کے پھیلاؤ کی روک تھام کے لیے جاری اقدامات پر پیش رفت کا تفصیلی جائزہ لیا گیا۔ شرکاء نے وزیراعظم کی جانب سے تشکیل دی گئی ایچ آئی وی ٹاسک فورس کی سفارشات پر بھی تفصیلی غور کیا اور ان پر عملدرآمد کی حکمت عملی کا جائزہ لیا۔

وزیر صحت مصطفیٰ کمال نے ایچ آئی وی سے نمٹنے کے لیے تمام متعلقہ اداروں کو واضح ٹاسک تفویض کرتے ہوئے کہا کہ اس مرض کے مؤثر تدارک اور کنٹرول کے لیے مربوط، مؤثر اور فوری اقدامات ناگزیر ہیں۔ انہوں نے ہدایت کی کہ تمام ادارے ایچ آئی وی ٹاسک فورس کی سفارشات پر عملدرآمد کو یقینی بنانے کے لیے باہمی تعاون اور مربوط حکمت عملی اختیار کریں۔

اجلاس کو بتایا گیا کہ نیشنل انسٹیٹیوٹ آف ہیلتھ سی ڈی سی اور سی ایم یو کی جانب سے ایچ آئی وی سے متعلق ایک جدید ڈیش بورڈ فعال کر دیا گیا ہے۔ وزیر صحت کے مطابق اس ڈیش بورڈ کے ذریعے ایچ آئی وی سے متعلق ڈیٹا بروقت رپورٹ کیا جا سکے گا، جس سے فیصلہ سازی کے عمل کو مزید مؤثر اور تیز بنایا جا سکے گا۔

مصطفیٰ کمال نے اس عزم کا اعادہ کیا کہ حکومت ملک میں ایچ آئی وی کے پھیلاؤ کو روکنے اور عوامی صحت کے تحفظ کے لیے ہر ممکن اقدامات کو یقینی بنا رہی ہے اور اس سلسلے میں تمام متعلقہ اداروں کے درمیان مؤثر رابطہ اور تعاون کو مزید مضبوط بنایا جائے گا۔