ایران نے معاہدے پر حتمی فیصلے کی تردید کر دی، پاکستان اور قطر ثالثی میں متحرک: اسماعیل بقائی

(تہران)ایران کی وزارت خارجہ کے ترجمان اسماعیل بقائی نے امریکہ اور ایران کے درمیان جاری مذاکرات کے حوالے سے کہا ہے کہ مجوزہ معاہدے پر ابھی کوئی حتمی فیصلہ نہیں کیا گیا اور تہران مختلف نکات کا تفصیلی جائزہ لے رہا ہے۔

ایران کی نیم سرکاری خبر رساں ایجنسی تسنیم کے مطابق اسماعیل بقائی نے کہا کہ ایران اپنی بنیادی ریڈ لائنز پر قائم ہے اور جب متعلقہ حکام کسی حتمی نتیجے پر پہنچ جائیں گے تو حکومت باضابطہ طور پر اس کا اعلان کرے گی۔

انہوں نے بتایا کہ معاہدے کے مسودے اور اس کے مختلف نکات پر داخلی سطح پر مشاورت جاری ہے۔ ان کا کہنا تھا کہ جب تک تمام متعلقہ فریقین مکمل اتفاق رائے تک نہیں پہنچتے، اس وقت تک کسی بھی ممکنہ معاہدے کو حتمی قرار نہیں دیا جا سکتا۔

ترجمان وزارت خارجہ نے کہا کہ پاکستان اور قطر مذاکراتی اور ثالثی عمل میں فعال کردار ادا کر رہے ہیں اور دونوں ممالک سفارتی پیش رفت کو آگے بڑھانے کے لیے مسلسل کوششیں کر رہے ہیں۔

اسماعیل بقائی نے مزید کہا کہ ایران نے مجوزہ معاہدے کے مسودے کے بڑے حصے پر اتفاق کیا تھا، تاہم امریکہ نے مذاکرات کے دوران متعدد مرتبہ اپنے مؤقف میں تبدیلی کی، جس سے پیش رفت متاثر ہوئی۔

انہوں نے واضح کیا کہ تہران اپنی قومی مفادات اور بنیادی اصولوں پر کوئی سمجھوتہ نہیں کرے گا اور ایران کی ریڈ لائنز بدستور برقرار ہیں۔ ان کے مطابق کسی بھی معاہدے کی کامیابی کا انحصار تمام فریقوں کے مستقل اور واضح مؤقف پر ہے