امید ہے ایران اور امریکا کو جلد مذاکرات کی میز پر بٹھانے میں کامیاب ہو جائیں گے،

(اسلام آباد)شہباز شریف کی زیر صدارت ایک اہم مشاورتی اجلاس منعقد ہوا جس میں ایران اور امریکا کے درمیان مذاکرات کی بحالی کیلئے جاری سفارتی کوششوں کا جائزہ لیا گیا۔

ذرائع کے مطابق اجلاس میں اسحاق ڈار، عطا تارڑ، طارق فاطمی اور آمنہ بلوچ بھی شریک تھے۔

اجلاس کے دوران وزیراعظم شہباز شریف نے کہا کہ امید ہے ایران اور امریکا کو جلد دوبارہ مذاکرات کی میز پر بٹھانے میں کامیاب ہو جائیں گے اور خطے میں کشیدگی کو کم کیا جا سکے گا۔

ذرائع کے مطابق اجلاس میں اسلام آباد میں مجوزہ مذاکرات کے دوسرے مرحلے کے انعقاد کیلئے جاری کوششوں پر تفصیلی غور کیا گیا جبکہ وزیر خارجہ اسحاق ڈار نے مختلف ممالک کے وزرائے خارجہ سے ہونے والے رابطوں پر وزیراعظم کو اعتماد میں لیا۔

اجلاس میں اس عزم کا اظہار کیا گیا کہ پاکستان مشرق وسطیٰ میں پائیدار امن کے قیام کیلئے اپنی سفارتی کوششیں جاری رکھے گا اور مذاکرات کے عمل کو آگے بڑھانے میں اپنا کردار ادا کرتا رہے گا۔