وزیراعظم شہباز شریف سے ایرانی سفیر کی ملاقات، علاقائی صورتحال اور امن پر تبادلہ خیال

(اسلام آباد) وزیراعظم شہباز شریف سے پاکستان میں تعینات ایرانی سفیر رضا امیری مقدم نے ملاقات کی، جس میں دوطرفہ تعلقات، علاقائی صورتحال اور خطے میں امن و استحکام پر تبادلہ خیال کیا گیا۔

وزیراعظم ہاؤس میں ہونے والی ملاقات کے دوران دونوں فریقین نے خطے میں کشیدگی کم کرنے اور باہمی تعاون کو مزید فروغ دینے پر زور دیا۔ اس موقع پر پاکستان اور ایران کے درمیان تعلقات کو مزید مستحکم بنانے کے مختلف پہلوؤں پر بھی گفتگو ہوئی۔

وزیراعظم شہباز شریف نے ایران کے ساتھ تعلقات کو مزید مضبوط بنانے کے عزم کا اعادہ کرتے ہوئے کہا کہ پاکستان خطے میں امن کے قیام کیلئے اپنا مثبت کردار ادا کرتا رہے گا۔

ملاقات میں تجارت، توانائی اور سرحدی تعاون سمیت باہمی دلچسپی کے مختلف امور بھی زیر بحث آئے۔ ایرانی سفیر رضا امیری مقدم نے دوطرفہ روابط کے استحکام اور مختلف شعبوں میں تعاون بڑھانے کی خواہش کا اظہار کیا۔

یہ ملاقات ایسے وقت میں ہوئی ہے جب خطے میں کشیدگی برقرار ہے اور سفارتی سطح پر روابط کو مزید فعال بنانے کی ضرورت پر زور دیا جا رہا ہے۔