ڈوپ ٹیسٹ کیس: محمد نواز نے آئی سی سی کو تحریری مؤقف جمع کرا دیا

(لاہور) محمد نواز نے ڈوپ ٹیسٹ مثبت آنے کے معاملے پر انٹرنیشنل کرکٹ کونسل (آئی سی سی) کو اپنا تحریری مؤقف جمع کرا دیا ہے۔

ذرائع کے مطابق ٹی ٹوئنٹی ورلڈ کپ کے دوران محمد نواز کا ڈوپ ٹیسٹ مثبت آیا تھا، جس کے بعد آئی سی سی نے معاملے کی باضابطہ انکوائری شروع کر دی۔ اب کھلاڑی کی جانب سے جواب جمع ہونے کے بعد کیس کی مزید کارروائی جاری ہے۔

اس حوالے سے پاکستان کرکٹ بورڈ کے ترجمان کا کہنا تھا کہ محمد نواز کے خلاف کارروائی آئی سی سی کے دائرہ اختیار میں ہے اور وہی اس عمل کو مکمل کرے گی۔

واضح رہے کہ اگر الزام ثابت ہو جاتا ہے تو ورلڈ اینٹی ڈوپنگ ایجنسی کے قوانین کے تحت محمد نواز کے خلاف سخت کارروائی عمل میں لائی جا سکتی ہے، جس میں معطلی بھی شامل ہو سکتی ہے۔

ذرائع کا کہنا ہے کہ کیس کے حتمی فیصلے تک محمد نواز کی کرکٹ سرگرمیوں پر بھی اثر پڑ سکتا ہے، تاہم حتمی فیصلہ آئی سی سی کی انکوائری مکمل ہونے کے بعد ہی سامنے آئے گا۔