امریکی صدر ٹرمپ کی صدارت میں سچویشن روم میں اہم اجلاس، ایران سے مذاکرات پر غور

(واشنگٹن) ذرائع کے مطابق اجلاس میں امریکی نائب صدر جے ڈی وینس، وزیر خارجہ مارکو روبیو، چیئرمین جوائنٹ چیفس آف اسٹاف جنرل ڈین کین، وائٹ ہاؤس چیف آف اسٹاف اور سی آئی اے ڈائریکٹر سمیت اعلیٰ حکام نے شرکت کی۔

مغربی میڈیا رپورٹس کے مطابق صدر ٹرمپ نے اجلاس سے قبل پاکستان کے فیلڈ مارشل عاصم منیر اور ایرانی حکام سے ٹیلیفونک رابطہ بھی کیا، جس میں خطے کی کشیدہ صورتحال اور مذاکراتی عمل پر تبادلہ خیال کیا گیا۔

رپورٹس میں مزید کہا گیا ہے کہ اگر مذاکرات میں بریک تھرو نہ ہوا تو آئندہ چند روز میں دوبارہ کشیدگی یا ممکنہ جنگ کا خدشہ موجود ہے۔

ذرائع کے مطابق امریکا اور ایران کے درمیان مذاکرات کے اگلے دور کی تاریخ تاحال طے نہیں کی جا سکی جبکہ وائٹ ہاؤس نے سچویشن روم اجلاس کے حوالے سے ابھی تک کوئی باضابطہ بیان جاری نہیں کیا۔

سفارتی حلقوں کا کہنا ہے کہ آئندہ چند دن صورتحال کے حوالے سے انتہائی اہم ثابت ہو سکتے ہیں۔